मधेश प्रदेश सरकारको भौतिक पूर्वाधार विकास मन्त्रालयअन्तर्गत बारामा सञ्चालित पूर्वाधार विकास कार्यालयमा तीन वर्ष नपुग्दै १० जना कार्यालय प्रमुख फेरिएका छन्। छोटो–छोटो अवधिमा कार्यालय प्रमुख परिवर्तन हुँदा प्रशासनिक निरन्तरता र विकास निर्माणका काम प्रभावित हुन सक्ने भन्दै सरुवा प्रक्रियामाथि प्रश्न उठ्न थालेको छ ।
कलैयामा २०८० भदौ २० गते पूर्वाधार विकास कार्यालय स्थापना हुँदा राजेन्द्र साहलाई निमित्त कार्यालय प्रमुखको जिम्मेवारी दिइएको थियो। करिब एक वर्ष तीन महिना १५ दिन जिम्मेवारी सम्हालेपछि उनको सरुवा भयो। त्यसपछि कार्यालय प्रमुख परिवर्तनको क्रम तीव्र बनेको देखिन्छ ।
२०८१ फागुन ४ गते ओमकुमार साह कार्यालय प्रमुखका रूपमा हाजिर भए। तर १५ दिन नपुग्दै फागुन २१ गते उनको सरुवा गरियो र पुनः राजेन्द्र साहलाई निमित्त प्रमुखको जिम्मेवारी दिइयो ।
त्यसपछि राजेन्द्र साहविरुद्ध नारायणी अस्पतालको आकस्मिक कक्ष भवन निर्माणको ठेक्का प्रक्रियामा १ करोड ८४ लाख ३८ हजार ४ सय ५८ रुपैयाँ अनियमितता गरेको आरोपमा अख्तियार दुरुपयोग अनुसन्धान आयोगले विशेष अदालतमा मुद्दा दायर गरेपछि उनी निलम्बनमा परे ।
साह निलम्बनमा परेपछि २०८२ जेठ ४ गते रिम्पुकुमारी यादवलाई निमित्त कार्यालय प्रमुखको जिम्मेवारी दिइयो। तर करिब चार महिनामै उनको सरुवा भयो र सञ्जयकुमार यादवलाई जिम्मेवारी दिइयो। सञ्जयकुमार यादव पनि २१ दिनमै सरुवा भएपछि मन्त्रालयले २०८२ कात्तिक २ गते पुनः ओमकुमार साहलाई कार्यालय प्रमुखका रूपमा पठायो ।
ओमकुमार साहले करिब ६ महिना जिम्मेवारी सम्हालेपछि २०८२ चैत १० गते उनलाई हटाएर अदालतबाट सफाइ पाएपछि राजेन्द्र साहलाई पुनः निमित्त कार्यालय प्रमुखको जिम्मेवारी दिइएको थियो। तर उनले पनि लामो समय जिम्मेवारी सम्हाल्न पाएनन्। संघीय सरकारबाट अन्तरप्रदेश सरुवा भएपछि २०८३ वैशाख २२ गते हेमन्तलाई कार्यालयको जिम्मेवारी दिइयो ।
हेमन्तले आफूले कार्यालय प्रमुखको जिम्मेवारी सम्हाल्न नसक्ने भन्दै मुख्यमन्त्री तथा मन्त्रिपरिषद्को कार्यालय र भौतिक पूर्वाधार विकास मन्त्रालयलाई लिखित जानकारी गराएपछि मन्त्रालयले २०८३ जेठ २५ गते पुनः ओमकुमार साहलाई कार्यालय प्रमुख बनाएर पठाएको थियो ।
आर्थिक वर्षको अन्तिम समयमा कार्यालयमा हाजिर भएका साहले विकास निर्माणसँग सम्बन्धित काम अघि बढाइरहेका बेला पुनः सरुवा भएका छन्। पछिल्लो निर्णयअनुसार मन्त्रालयमा निमित्त प्रदेश सचिवका रूपमा कार्यरत सञ्जयप्रसाद साहलाई बाराको पूर्वाधार विकास कार्यालयमा पठाइएको छ ।
यसरी कार्यालय स्थापना भएको तीन वर्ष पुग्न नपाउँदै पटक–पटक प्रमुख परिवर्तन हुँदा आयोजना कार्यान्वयन, प्रशासनिक निरन्तरता र विकास निर्माणको अनुगमनमा असर पर्न सक्ने देखिएको छ ।
कार्यालय प्रमुखको छोटो अवधिमै हुने सरुवाले कर्मचारीलाई योजना तथा आयोजनाबारे आवश्यक जानकारी हासिल गरी प्रभावकारी रूपमा काम गर्न कठिन हुने तथा जिम्मेवारी हस्तान्तरणको प्रक्रिया दोहोरिरहने अवस्था सिर्जना भएको देखिन्छ ।
यसैबीच, कर्मचारी सरुवामा राजनीतिक तथा प्रशासनिक प्रभाव रहेको भन्ने आरोपसमेत उठ्दै आएको छ। यद्यपि, पछिल्ला सरुवाका सम्बन्धमा मन्त्रालयले सार्वजनिक रूपमा विस्तृत कारण भने स्पष्ट पारेको छैन ।
