क्षेत्रीय कार्यसमिति र महाधिवेशन प्रतिनिधि चयन प्रक्रियामा एकलौटी गरिएको आरोप लगाउँदै पर्साका २७ जना कांग्रेस नेता–कार्यकर्ताले पार्टीबाट सामूहिक राजीनामा दिएका छन् ।
हालै सम्पन्न नेपाली कांग्रेसको १५औँ महाधिवेशनअन्तर्गतका क्षेत्रीय अधिवेशनमा कार्यकर्तालाई बाइपास गरी आसेपासेलाई महाधिवेशन प्रतिनिधि तथा विभिन्न समितिमा ल्याइएको आरोप लगाउँदै उनीहरूले जिल्ला सभापतिसमक्ष राजीनामा बुझाएका हुन् ।
कांग्रेस पर्साका जिल्ला सदस्य हिरालाल कानुसहित २७ जना नेता–कार्यकर्ताले कांग्रेसको साधारण सदस्यसमेत नरहने गरी पार्टी परित्याग गरेको घोषणा गरेका छन् ।
दुईपटक कांग्रेसको बुथ सभापति भइसकेका कानु २०५४ सालको स्थानीय तह निर्वाचनमा कांग्रेसबाट वडा सदस्यमा निर्वाचित भएका थिए ।
बुधबार कांग्रेस पर्साका सभापतिलाई सम्बोधन गरी बुझाइएको राजीनामा पत्रमा कानुसहित वीरगंज महानगरपालिका–१० का सोनाल गुप्ता, वीरेन्द्र साह कानु, तिलक साह कानु, लक्ष्मण कानु, दीपक साह कानु, डा. जयकुमार गुप्ता, डा. राजकुमार गुप्ता, अनिता देवी गुप्ता, काजल कुमारी, भरत साह कानु, मुनिलाल साह कानु, सञ्जय चौधरी, रोहित चौधरी र सरोजकुमार साहलगायत २७ जनाले आफूहरू कांग्रेस परित्याग गरेको जानकारी गराएका छन् ।
राजीनामा दिनेहरूले पछिल्लो समय पार्टीभित्र देखिएका बेथिति सुधार गर्नुको सट्टा वर्षौंदेखि पार्टीमा हालीमुहाली गर्दै आएका केही नेताहरूमा नातावाद, कृपावाद र ‘झोले’ प्रवृत्ति बढ्दै गएको आरोप लगाएका छन् ।
पार्टीको आन्तरिक लोकतान्त्रिक प्रक्रियामा कार्यकर्ताको सहभागितालाई बेवास्ता गर्दै आफूखुसी निर्णय गर्ने प्रवृत्ति बढेको भन्दै त्यसको विरोधस्वरूप सामूहिक राजीनामा दिन बाध्य भएको उनीहरूको भनाइ छ ।
