बीरगंज उद्योग वाणिज्य संघले पूर्वप्रधानमन्त्रीद्वय पुष्पकमल दाहाल र माधवकुमार नेपालसँग उद्योग तथा व्यापार क्षेत्रमा देखिएका समस्या र चुनौतीबारे छलफल गरेको छ ।
बुधबार बीरगंज उद्योग वाणिज्य संघका अध्यक्ष हरिप्रसाद गौतमको नेतृत्वमा उद्योगी–व्यवसायीको टोलीले पूर्वप्रधानमन्त्रीद्वयसँग भेट गरी निजी क्षेत्रले लामो समयदेखि भोग्दै आएका समस्या, लगानीको वातावरण तथा उद्योग–व्यापार प्रवर्द्धनका विषयमा छलफल गरेको हो ।
छलफलका क्रममा अध्यक्ष गौतमले उधारो कारोबारका कारण उद्योगी तथा व्यवसायीले भोग्दै आएको समस्यालाई प्रमुखताका साथ उठाएका थिए । उधारोमा कारोबार गरेको रकम असुलीमा कानुनी जटिलता देखिँदै आएको भन्दै उनले यसको समाधानका लागि छुट्टै कानुन निर्माण गरी प्रभावकारी कार्यान्वयन गर्नुपर्ने आवश्यकता औँल्याए ।
यस्तै, स्थानीय तहबाट लगाइने कबाडी कर, सवारी करलगायतका करका कारण निजी क्षेत्रले भोग्दै आएका समस्याबारे पनि पूर्वप्रधानमन्त्रीद्वयलाई जानकारी गराइएको संघले जनाएको छ ।
गौतमले उद्योग तथा व्यापार क्षेत्रको विकास, लगानीमैत्री वातावरण निर्माण तथा निजी क्षेत्रले भोग्दै आएका नीतिगत र व्यावहारिक समस्याबारे बुँदागत रूपमा धारणा राखेका थिए ।
निजी क्षेत्रको लगानी प्रवर्द्धन र उद्योग–व्यवसायको वातावरण सुधारका लागि आवश्यक नीतिगत पहल गर्न उनले पूर्वप्रधानमन्त्रीद्वयसँग आग्रह गरेका थिए ।
