पर्साको सखुवा प्रसौनी गाउँपालिकास्थित श्री गढी भगवती आधारभूत विद्यालयमा तीन महिनादेखि दिवा खाजा बन्द भएको भन्दै स्थानीयले तत्काल सञ्चालनको माग गरेका छन् ।
विद्यालयमा अधिकांश विद्यार्थी दलित समुदायका रहेको बताउँदै स्थानीय प्रेम चौधरीले लामो समयसम्म खाजा बन्द हुनु गम्भीर विषय भएको बताए। उनले प्रधानाध्यापकको अभाव देखाएर विद्यार्थीलाई खाजाबाट वञ्चित गरिएको भन्दै गाउँपालिका नेतृत्वको कार्यशैलीमाथि प्रश्न उठाए ।
गाउँपालिका अध्यक्ष जसवन्त यादवले समस्या तत्काल समाधान गर्ने बताएका छन्। उनका अनुसार खाजा कार्यक्रम बन्द हुनुको मुख्य कारण विद्यालयमा प्रधानाध्यापकको अभाव हो ।
वडा अध्यक्ष चिरञ्जीवीप्रसाद महतो थारूले आफ्नो वडामा सातवटा विद्यालय रहे पनि गाउँपालिकाबाट आवश्यक सहयोग नहुँदा शिक्षा क्षेत्रमा अपेक्षित काम गर्न नसकिएको बताए ।
स्थानीयले विद्यालयमा नियमित दिवा खाजा सञ्चालन गर्न माग गरेका छन् ।
