नेपाली कांग्रेस पर्साका पूर्वसभापति एवं पूर्वसांसद अजय द्विवेदी पार्टीको १५औँ महाधिवेशनका लागि महाधिवेशन प्रतिनिधि चयन हुन सकेनन् ।
कांग्रेसको १५औँ महाधिवेशनअन्तर्गत पर्सा क्षेत्र नम्बर १ मा सम्पन्न क्षेत्रीय अधिवेशनबाट महाधिवेशन प्रतिनिधि छनोट हुँदा द्विवेदीको नाम समावेश नभएको हो ।
पर्सा कांग्रेसका अनुसार क्षेत्र नम्बर १ का क्षेत्रीय प्रतिनिधिहरूबीच भएको सहमति र भागबन्डाका आधारमा महाधिवेशन प्रतिनिधि चयन गरिएको हो । सोही अधिवेशनबाट पूर्वक्षेत्रीय सभापति अरबिन्द गुप्ता महाधिवेशन प्रतिनिधिमा सर्वसम्मत निर्वाचित भएका छन् । गुप्ताका अनुसार अन्य नेता तथा कार्यकर्तालाई समेत अवसर दिनुपर्ने भएकाले द्विवेदी महाधिवेशन प्रतिनिधि नबन्न सहमत भएका हुन् ।
यता पूर्वसभापति द्विवेदीले भने पार्टीका पुराना तथा ज्येष्ठ नेता ब्रह्मदेव राउतलाई यसपटक महाधिवेशन प्रतिनिधिका रूपमा अवसर दिन आफूले दाबी छाडेको बताएका छन् । सबैलाई समेटेर अघि बढ्नुपर्ने भएकाले आफूले प्रतिनिधि बन्ने अवसर त्यागेको उनको भनाइ छ ।
द्विवेदी महाधिवेशन प्रतिनिधिमा नपरेपछि कांग्रेस पर्साभित्र भने यस विषयलाई लिएर विभिन्न चर्चा हुन थालेका छन् । केहीले क्षेत्रीय अधिवेशनमा भएको आन्तरिक सहमति र समीकरणलाई यससँग जोडेर हेरेका छन् । यद्यपि, द्विवेदीले भने आफूले ज्येष्ठ नेता राउतलाई अवसर दिन स्वेच्छाले दाबी छाडेको बताएका छन् ।
