स्वास्थ्य बीमा कार्यक्रमअन्तर्गत आगामी पुस १ गतेदेखि १६ वर्ष उमेर पूरा गरेका नागरिकका लागि राष्ट्रिय परिचयपत्र अनिवार्य गरिने भएको छ। स्वास्थ्य बीमा बोर्डको बैठकले नयाँ आबद्धता, नवीकरण र बीमा सेवा लिन राष्ट्रिय परिचयपत्र आवश्यक पर्ने निर्णय गरेको हो ।
बोर्डका अनुसार सामान्य तथा लक्षित वर्गका सबै बीमित परिवारले स्वास्थ्य बीमा बोर्डको एचआईबी ई–पोर्टल (HIB e-Portal) मार्फत आफ्नो विवरण अद्यावधिक गर्नुपर्नेछ ।
बीमितको पहिचान सुनिश्चित गर्ने, दोहोरो आबद्धता रोक्ने, ग्राहक पहिचान विवरण (केवाईसी) अद्यावधिक गर्ने तथा दाबी व्यवस्थापनलाई थप प्रभावकारी बनाउने उद्देश्यले यस्तो व्यवस्था लागू गर्न लागिएको बोर्डले जनाएको छ ।
बैठकले स्वास्थ्य बीमा कार्यक्रमअन्तर्गत सेवा खरिद र भुक्तानी प्रणालीलाई थप वैज्ञानिक तथा लागत प्रभावकारी बनाउन रणनीतिक खरिदसम्बन्धी अध्ययन कार्यदल गठन गर्ने निर्णय पनि गरेको छ। उक्त कार्यदललाई ६० दिनभित्र अध्ययन प्रतिवेदन बुझाउने जिम्मेवारी दिइएको छ ।
त्यस्तै, विद्युतीय स्वास्थ्य अभिलेख (ईएमआर) प्रणालीबाट प्राप्त डिजिटल स्वास्थ्य विवरण तथा दाबी अभिलेखलाई निर्धारित मापदण्डअनुसार मान्यता दिने निर्णय भएको छ। यसले स्वास्थ्य सेवा प्रदायकबाट प्राप्त विवरणको मूल्यांकन र दाबी व्यवस्थापनलाई व्यवस्थित बनाउने अपेक्षा गरिएको छ ।
बोर्डले पहिलो चरणमा २ हजार १८९ वटा परिमार्जित आईसीडी–११ कोड (Customized ICD-11 Code) स्वास्थ्य बीमा व्यवस्थापन सूचना प्रणाली (IMIS) मा प्रयोग गर्ने निर्णयसमेत गरेको बोर्ड सचिवालयले जनाएको छ।
स्वास्थ्य बीमा बोर्डका चार निर्णय:
१. पुस १ देखि १६ वर्ष उमेर पूरा गरेका नागरिकका लागि नयाँ आबद्धता, नवीकरण तथा सेवा प्राप्तिमा राष्ट्रिय परिचयपत्र अनिवार्य गर्ने ।
२. स्वास्थ्य बीमा सेवा खरिद तथा भुक्तानी प्रणाली सुधारका लागि रणनीतिक खरिदसम्बन्धी अध्ययन कार्यदल गठन गरी ६० दिनभित्र प्रतिवेदन बुझाउने ।
३. ईएमआर प्रणालीबाट प्राप्त डिजिटल स्वास्थ्य अभिलेख तथा दाबी विवरणलाई निर्धारित मापदण्डअनुसार मान्यता दिने ।
४. पहिलो चरणमा २ हजार १८९ वटा Customized ICD-11 Code स्वास्थ्य बीमा व्यवस्थापन सूचना प्रणाली (IMIS) मा लागू गर्ने ।
नयाँ व्यवस्थाले स्वास्थ्य बीमा कार्यक्रमको पहिचान, अभिलेख व्यवस्थापन र भुक्तानी प्रक्रियालाई थप व्यवस्थित बनाउने बोर्डको अपेक्षा छ ।
