एसीसी प्रिमियर कपको उपाधि जितेर उत्साहित बनेको नेपाली क्रिकेट टोली अब आईसीसी विश्वकप लिग–२ को निर्णायक चरणमा प्रवेश गर्दैछ । ओमानमा हुने आगामी शृङ्खला नेपालका लागि विश्वकप छनोटको सम्भावना मात्र होइन, एकदिवसीय अन्तर्राष्ट्रिय (ओडीआई) मान्यता जोगाउने दृष्टिले समेत निकै महत्वपूर्ण बनेको छ ।
लिग–२ मा शीर्ष चारभित्र पर्दै सोझै विश्वकप छनोटमा पुग्ने नेपालको सम्भावना निकै कमजोर भइसकेको छ। यद्यपि गणितीय सम्भावना भने अझै बाँकी छ। आगामी खेलका अधिकांश नतिजा नेपालकै पक्षमा आएमा शीर्ष चारमा पुग्ने बाटो खुल्न सक्छ। तर त्यसका लागि अन्य टोलीको प्रदर्शनसमेत नेपालको अनुकूल हुनुपर्नेछ ।
शीर्ष चारमा पर्न नसके पनि नेपालले प्लेअफमार्फत विश्वकप छनोट प्रतियोगितामा पुग्ने अवसर पाउन सक्छ। त्यसैले अहिलेको अवस्थामा नेपालको सबैभन्दा महत्वपूर्ण लक्ष्य लिग–२ को अन्तिम तालिकामा सुरक्षित स्थान बनाउँदै ओडीआई मान्यता जोगाउनु हो ।
नेपाल अहिले ३२ खेलबाट २४ अंकसहित तालिकाको सातौँ स्थानमा छ। छैटौँ स्थानमा रहेको क्यानडाको ३२ खेलबाट २५ अंक छ। नेपालभन्दा माथि ओमान २८ खेलबाट ३१ अंकसहित चौथो, नामिबिया ३३ खेलबाट २९ अंकसहित पाँचौँ र क्यानडा २५ अंकसहित छैटौँ स्थानमा छन्। आठौँ स्थानमा रहेको यूएईको २९ खेलबाट १९ अंक छ ।
अब ओमानमा नेपालले आयोजक ओमान र क्यानडासँग चार खेल खेल्नेछ। यी खेलमा नेपालले अधिकतम अंक हासिल गर्न सके तालिकामा आफ्नो स्थिति सुधार गर्ने बलियो अवसर पाउनेछ ।
विशेषगरी क्यानडाविरुद्धका दुई खेल नेपालको समीकरणका लागि निर्णायक बन्न सक्छन्। नेपालले क्यानडालाई दुवै खेलमा पराजित गर्न सके अंक तालिकामा आफूभन्दा अगाडि रहेको टोलीलाई पछि पार्ने आधार तयार हुनेछ । ओमानविरुद्ध पनि राम्रो नतिजा निकाल्न सके नेपाल शीर्ष ६ मा पुग्ने सम्भावना अझ बलियो हुनेछ ।
नेपालले आगामी चारमध्ये तीन वा चारै खेल जित्न सके ३० देखि ३२ अंकसम्म पुग्नेछ। यस्तो अवस्थामा शीर्ष ६ मा रहने सम्भावना निकै बलियो बन्नेछ। तर जित निकाल्न नसके नेपालले अन्य टोलीको नतिजामा समेत निर्भर रहनुपर्ने अवस्था आउन सक्छ ।
यसपछि यूएई, नेदरल्यान्ड्स र ओमानबीच लिग–२ को अन्तिम शृङ्खला हुनेछ। त्यसैले ओमानमा हुने नेपालको प्रदर्शनले अन्तिम अंक तालिकाको समीकरणलाई समेत ठूलो प्रभाव पार्नेछ ।
कप्तानी परिवर्तनपछि नयाँ चुनौती
नेदरल्यान्ड्समा भएको पछिल्लो लिग–२ शृङ्खलामा नेपालले चारै खेल गुमाएको थियो। त्यसपछि टोलीको कप्तानीमा परिवर्तन गर्दै रोहित पौडेलको स्थानमा सन्दीप लामिछानेलाई जिम्मेवारी दिइएको छ ।
सन्दीपको कप्तानीमा नेपालले हालै एसीसी प्रिमियर कपको उपाधि जितेको छ। त्यसले टोलीको मनोबल बढाएको भए पनि लिग–२ मा भने नेपालले आफ्नो प्रदर्शनमा उल्लेख्य सुधार गर्नुपर्ने आवश्यकता छ ।
कप्तान सन्दीपले टोलीको लयमा परिवर्तन आएको बताउँदै ओडीआई मान्यता जोगाउने र विश्वकप छनोटसम्म पुग्ने लक्ष्य रहेको बताएका छन् ।
मुख्य प्रशिक्षक स्टुअर्ट लका लागि पनि ओमान शृङ्खला निकै महत्वपूर्ण छ। उनले केवल जितको लक्ष्य राख्नु पर्याप्त नभई त्यसका लागि स्पष्ट योजना र सही प्रक्रियासहित मैदानमा प्रदर्शन गर्नुपर्नेमा जोड दिएका छन् ।
टोलीमा केही परिवर्तन
नेपालले एसीसी प्रिमियर कपमा सहभागी टोलीलाई नै अधिकांश रूपमा निरन्तरता दिएको छ। हेमन्त धामीको स्थानमा नन्दन यादवलाई टोलीमा फर्काइएको छ भने बायाँहाते स्पिनर शाहब आलम पनि टोलीमा समावेश भएका छन् ।
आसिफ शेख र अर्जुन कुमालले ओपनिङको जिम्मेवारी निरन्तरता पाउने सम्भावना छ। त्यसपछि इशान पाण्डे, देव खनाल र रोहित पौडेलजस्ता ब्याटर विकल्पमा छन् ।
मध्यक्रममा दीपेन्द्रसिंह ऐरी, गुल्शन झा, सन्दीप जोरालगायत खेलाडी रहनेछन्। बलिङतर्फ करण केसी र नन्दन यादवसँगै कप्तान सन्दीप लामिछाने, ललित राजवंशी, शेर मल्ल र शाहब आलम मुख्य विकल्पका रूपमा छन् ।
नेपालसँग पेसभन्दा स्पिन बलिङमा बढी विकल्प देखिन्छ। सन्दीप, ललित, शाहब, शेर र बसिर अहमदसँगै दीपेन्द्र र रोहितले पनि आवश्यकताअनुसार बलिङ गर्न सक्छन् ।
अब यी विकल्पमध्ये मैदानमा कुन संयोजनसहित नेपाल उत्रिन्छ भन्ने विषय पनि महत्वपूर्ण हुनेछ। तर एउटा कुरा स्पष्ट छ—ओमानमा हुने शृङ्खलामा नेपालले अंक गुमाउने सुविधा निकै कम छ। ओडीआई मान्यता जोगाउने यात्रामा प्रत्येक खेलको नतिजा निर्णायक बन्नेछ ।
