वीरगंज महानगरपालिका–२५ श्रीसियाका प्रभावित जग्गाधनीहरूले ड्राइपोर्टका लागि अधिग्रहण गरिएको जग्गा तथा त्यहाँ रहेका भौतिक संरचनाको बाँकी मुआब्जा र क्षतिपूर्ति माग गर्दै आज धर्नामा बसेका छन् ।
मुआब्जा संघर्ष समितिको आयोजनामा भएको धर्नामा लामो समयदेखि मुआब्जा नपाएका प्रभावित जग्गाधनी तथा स्थानीयवासी सहभागी भएका हुन् । उनीहरूले अधिग्रहण प्रक्रिया सुरु भएको वर्षौं बितिसक्दा पनि केही जग्गाधनीले अझै पूर्ण मुआब्जा पाउन नसकेको भन्दै तत्काल प्रक्रिया टुंग्याउन माग गरेका छन्।
समितिका अनुसार ड्राइपोर्ट र एकीकृत सुरक्षा जाँच चौकी (आईसीपी) बीचको जग्गा अधिग्रहणका क्रममा नक्सा, फिल्डबुक तथा अन्य सरकारी अभिलेखमा देखिएका समस्याका कारण केही जग्गाधनीको मुआब्जा प्रक्रिया रोकिएको छ। यही कारण वास्तविक जग्गाधनीले आफ्नो सम्पत्ति प्रयोग गर्नसमेत नपाउने र मुआब्जा पनि नपाउने अवस्था रहेको उनीहरूको भनाइ छ।
