पर्साको सखुवा प्रसौनी गाउँपालिका–२ औराहा पञ्चगावामा जितिया पर्वको अवसरमा आयोजित मेलाअन्तर्गत दंगल कुस्ती प्रतियोगिता सोमबारदेखि सुरु भएको छ ।
कुस्ती प्रतियोगिताको उद्घाटन सखुवा प्रसौनी गाउँपालिकाका अध्यक्ष यशवन्त यादवले गरेका हुन् । उद्घाटन कार्यक्रममा स्थानीय जनप्रतिनिधि, समाजसेवी, स्थानीयवासी तथा खेलप्रेमीहरूको सहभागिता रहेको थियो ।
प्रतियोगितामा नेपालका विभिन्न स्थानका साथै भारतका विभिन्न क्षेत्रबाट आएका पहलवानहरूले सहभागिता जनाएका छन्। प्रतियोगितामा सहभागी पहलवानहरूले आफ्नो शारीरिक क्षमता, कुस्ती कौशल र प्रतिस्पर्धात्मक कला प्रदर्शन गर्नेछन् ।
जितिया पर्वको अवसरमा आयोजना गरिएको दंगल कुस्ती प्रतियोगिताले स्थानीय कला, संस्कृति, परम्परा तथा मौलिक खेलकुदको संरक्षण र प्रवर्द्धनमा योगदान पुर्याउने आयोजकले जनाएको छ ।
प्रतियोगिता हेर्न औराहा पञ्चगावासहित आसपासका क्षेत्रबाट दर्शकहरूको उल्लेख्य उपस्थिति रहेको छ । स्थानीयस्तरमा परम्परागत रूपमा आयोजना हुँदै आएको कुस्ती प्रतियोगिताले जितिया पर्वको सांस्कृतिक र मनोरञ्जनात्मक पक्षलाई थप आकर्षक बनाएको आयोजकको भनाइ छ ।
