विश्व फुटबलका चर्चित खेलाडी लियोनेल मेस्सीले अर्जेन्टिना राष्ट्रिय टोलीसँगको २१ वर्ष लामो अन्तर्राष्ट्रिय फुटबल यात्राबाट औपचारिक बिदाइ लिएका छन् ।
ब्यूनस आयर्सस्थित ऐतिहासिक मोनुमेन्टल स्टेडियममा मंगलबार राति आयोजित विशेष खेलमा अर्जेन्टिनाले बेनिनलाई ३–० ले पराजित गरेको थियो। करिब ८५ हजार समर्थकको उपस्थितिमा भएको उक्त खेल मेस्सीको अन्तर्राष्ट्रिय करिअरको भावुक विदाइ बनेको हो । ‘द लास्ट ट्याङ्गो’ नाम दिइएको विशेष खेलमा ३९ वर्षीय मेस्सीले अर्जेन्टिनाका लागि एक गोल गर्नुका साथै एक गोलका लागि असिस्ट पनि प्रदान गरे। खेलको ७१औँ मिनेटमा गोल गपेनाल्टीमार्फत र्दै उनले अन्तर्राष्ट्रिय फुटबलमा आफ्नो गोल संख्या १२६ पुर्याएका छन् ।
यसअघि मेस्सीले निकोलस ओटामेन्डीका लागि गोलको अवसर सिर्जना गरेका थिए। अर्जेन्टिनाका लागि अर्को गोल युवा खेलाडी निको पाजले गरेका थिए ।
मेस्सीको विदाइका क्रममा मोनुमेन्टल स्टेडियम भावुक बनेको थियो। टोलीको बसमा रंगशालातर्फ आउँदा सडकमा देखिएको समर्थकको ठूलो भीडले मेस्सीलाई भावुक बनाएको थियो। उनी आफ्ना तीन सन्तानसँगै मैदान प्रवेश गर्दा उनकी पत्नी एन्टोनेला रोकुजो र आमा सेलिया कुचिटिनीले ताली बजाएर स्वागत गरेका थिए ।
खेल सुरु हुनुअघि मैदानमा मेस्सीको चर्चित १० नम्बर जर्सीमा ‘धन्यवाद’ लेखिएको विशाल जर्सी प्रदर्शन गरिएको थियो। खेलको १०औँ मिनेटमा उनको १० नम्बर जर्सीको सम्मानमा एक मिनेट खेल रोकेर दर्शकहरूले उभिएर ताली बजाएका थिए।
खेल सकिएपछि रंगशालामाथि गरिएको ड्रोन शोमा मेस्सीको तस्बिरसँगै धन्यवाद सन्देश प्रस्तुत गरिएको थियो।
विश्वकपदेखि कोपा अमेरिकासम्म ऐतिहासिक यात्रा
अर्जेन्टिना राष्ट्रिय टोलीसँगको लामो यात्रामा मेस्सीले देशलाई महत्वपूर्ण अन्तर्राष्ट्रिय उपाधि दिलाएका छन्। सन् २०२२ मा अर्जेन्टिनाले ३६ वर्षपछि विश्वकप उपाधि जित्दा मेस्सी टोलीका कप्तान थिए।
उनकै कप्तानीमा अर्जेन्टिनाले सन् २०२१ र २०२४ मा कोपा अमेरिका उपाधि जितेको थियो। यसअघि अर्जेन्टिना सन् २०१४ को विश्वकपमा उपविजेता बनेको थियो।
अन्तर्राष्ट्रिय फुटबलबाट बिदाइ लिँदै गर्दा मेस्सीको नाम अर्जेन्टिनाको फुटबल इतिहासमा सर्वाधिक गोलकर्ता र सर्वाधिक खेल खेल्ने खेलाडीका रूपमा स्थापित भएको छ।
यसैबीच, मेस्सीका पूर्वसहकर्मी नेमारले सामाजिक सञ्जालमार्फत उनको योगदानको प्रशंसा गर्दै फुटबलप्रति आफूमा अझ बढी माया जगाइदिएकोमा धन्यवाद दिएका छन्।
अन्तर्राष्ट्रिय करिअरबाट बिदाइ लिए पनि मेस्सीले क्लब फुटबल भने जारी राख्नेछन्। उनी अमेरिकी क्लब इन्टर मियामीसँग आबद्ध छन्।
