चिकित्सा शिक्षा आयोगको कार्यालय अगाडि आमरण अनसन बस्दै आएका एमबीबीएस इन्टर्न चिकित्सक डिल्ली हरिजनको स्वास्थ्यमा समस्या आएपछि उपचारका लागि वीर अस्पताल लगिएको छ ।
अनसनका क्रममा रक्तचाप घट्नुका साथै शरीर कमजोर भएपछि हरिजनलाई उपचारका लागि वीर अस्पताल लगिएको हो। उनी आज अनसनको तेस्रो दिनमा छन् । यसअघि पनि अनसन बसेका हरिजनले सहमति भएको दुई महिना बितिसक्दा समेत माग कार्यान्वयन नभएको भन्दै पुनः आमरण अनसन सुरु गरेका हुन् । एमबीबीएस तथा बीडीएस इन्टर्न चिकित्सकसँग भएको पाँचबुँदे सहमति कार्यान्वयन गर्न माग गर्दै उनले चिकित्सा शिक्षा आयोगको प्राङ्गणमा अनसन थालेका हुन् । हरिजनले आफूले उठाएको माग व्यक्तिगत नभई हजारौँ एमबीबीएस तथा बीडीएस विद्यार्थी र इन्टर्न चिकित्सकको भविष्यसँग जोडिएको विषय भएको बताएका छन्। सहमति कार्यान्वयन भएमा त्यसको सकारात्मक प्रभाव आगामी पुस्ताका विद्यार्थी तथा चिकित्सकसम्म पुग्ने उनको भनाइ छ।
एमबीबीएस, बीडीएसलगायत एकवर्षे इन्टर्नसिपमा स्वास्थ्य सेवाको आठौँ तहको प्रारम्भिक तलबमानको ५० प्रतिशत बराबर निर्वाह भत्ता उपलब्ध गराउने विषयमा छलफल गर्ने, स्वीकृत शुल्कबाहेक अतिरिक्त शुल्क लिन नपाउने व्यवस्था गर्ने तथा एमबीबीएस र बीडीएस विद्यार्थीका लागि छात्रावासलाई अनिवार्य नभई वैकल्पिक बनाउने सहमति भएको थियो ।त्यस्तै, इन्टर्न तथा आवासीय चिकित्सकको कार्यघण्टा श्रम ऐनअनुसार समान बनाउन समिति गठन गर्ने र मेडिकल कलेजले लिएको अतिरिक्त शुल्क छानबिन गरी फिर्ता गराउनेलगायत पाँचबुँदे सहमति भएको थियो।तर सहमति कार्यान्वयन नभएको भन्दै हरिजनले पुनः आन्दोलनको बाटो रोजेका हुन् ।
