वीरगंज महानगरपालिका–२० स्थित हरपतगंज गाउँ जाने सडक विगत ९ वर्षदेखि अलपत्र अवस्थामा रहेको स्थानीयले गुनासो गरेका छन् ।
सडक निर्माण नहुँदा वर्षौंदेखि स्थानीयवासीले सास्ती खेप्दै आए पनि सम्बन्धित निकायले समस्या समाधानमा चासो नदिएको उनीहरूको आरोप छ ।
हरपतगंज गाउँ पुग्ने मुख्य बाटो नै लामो समयदेखि जीर्ण तथा अव्यवस्थित अवस्थामा रहेपछि स्थानीयलाई आवतजावतमा समस्या हुँदै आएको छ । सडकको अवस्था सुधारका लागि पटक–पटक आवाज उठाए पनि अहिलेसम्म ठोस काम नभएको उनीहरुको भनाइ छ ।
स्थानीय साजन पुरीका अनुसार वर्षौंदेखि सडक निर्माणको आश्वासन सुन्दै आए पनि सडकको अवस्था भने उस्तै छ । निर्वाचनका बेला विकासका प्रतिबद्धता गरिए पनि निर्वाचित जनप्रतिनिधिले स्थानीयको मुख्य समस्यालाई प्राथमिकतामा नराखेको उनले गुनासो गरे ।
त्यस्तै अर्का रोशन रामले सडकको दुरवस्थाका कारण दैनिक आवतजावतदेखि बिरामी तथा आकस्मिक अवस्थामा समेत समस्या हुने गरेको बताए । उनका अनुसार सामान्य वर्षा हुँदा बाटो थप खराब हुने र हिँडडुल तथा सवारीसाधन सञ्चालनमा कठिनाइ हुने गरेको छ ।
सञ्जय यादवले वर्षौंसम्म सडक निर्माणको विषय उठे पनि समस्या समाधान नभएको भन्दै स्थानीय निराश बनेको बताए । “जुन जोगी आए पनि कानै चिरेको” जस्तै अवस्था रहेको उल्लेख गर्दै यादवले नेतृत्व फेरिए पनि वडाको विकासको अवस्था नफेरिएको गुनासो गरे ।
“९ वर्षमा सडक मात्रै होइन, अन्य विकास पनि भएन”
वडाको विकासको विषयमा बोल्दै यसअघिका वडाध्यक्ष पारस यादवले आफ्नो कार्यकालमा समेत वडाको विकासका लागि पर्याप्त बजेट तथा योजना नआएको दाबी गरे ।
यादवका अनुसार हरपतगंज जाने सडक स्थानीयको लामो समयदेखिको माग भए पनि सडक निर्माणलाई प्राथमिकतामा राखेर काम अघि बढ्न सकेन । सडकसँगै वडाका अन्य विकासका आवश्यकतामा समेत पर्याप्त ध्यान नदिइएको उनको भनाइ छ । उनले महानगरपालिकाबाट आवश्यक बजेट तथा योजना सुनिश्चित हुन नसक्दा वडाका कतिपय विकासका काम प्रभावित भएको बताए ।
उनले वीरगंज महानगरपालिकाका मेयर राजेशमान सिंहले आफ्नो कार्यकालमा सडक निर्माणका लागि मात्रै नभई वडाका अन्य विकास योजनामा समेत पर्याप्त बजेट विनियोजन नगरेको आरोप लगाए ।
स्थानीयवासीले जनप्रतिनिधि परिवर्तन भए पनि आफूहरूको समस्या भने जस्ताको तस्तै रहेको बताएका छन् ।
