१. मधेश कृषि विश्वविद्यालयका भवन निर्माण सुस्त, ४५ प्रतिशत मात्रै काम सम्पन्न
मधेश प्रदेश सरकारको गौरव आयोजनाका रूपमा अघि बढाइएको मधेश कृषि विश्वविद्यालयको भौतिक पूर्वाधार निर्माणले अपेक्षित गति लिन सकेको छैन ।
सप्तरीको राजविराज नगरपालिका–१३, विषहरियास्थित कृषि नगरमा निर्माणाधीन पाँचवटा भवनको काम ठेक्का सम्झौताको म्याद सकिन करिब तीन महिना बाँकी रहँदा जम्मा ४५ प्रतिशत मात्रै सम्पन्न भएको छ ।
करिब एक अर्ब रुपैयाँ लागतमा निर्माण भइरहेको प्रशासनिक भवन, कक्षाकोठा, प्रयोगशाला र छात्रावासलगायतका संरचना तोकिएको समयमै सम्पन्न हुनेमा चुनौती देखिएको छ ।
२. मधेशमा विद्युत् चुहावट घट्यो, दुई महिनामा २०.९५ प्रतिशतमा झर्यो
मधेश प्रदेशमा विद्युत् चुहावट घट्दै गएको छ ।
नेपाल विद्युत् प्राधिकरणका अनुसार चालु आर्थिक वर्ष २०८३/८४ को पहिलो दुई महिनामा विद्युत् चुहावट २० दशमलव ९५ प्रतिशतमा झरेको छ ।
गत आर्थिक वर्षको सोही अवधिमा चुहावट २२ दशमलव ५६ प्रतिशत थियो। अर्थात्, एक वर्षको अवधिमा विद्युत् चुहावट १ दशमलव ६१ प्रतिशतले घटेको हो ।
प्राधिकरणका अनुसार हुकिङ नियन्त्रण, मिटर परिवर्तन तथा बिलिङ र रिडिङमा सुधार गरिएपछि विद्युत् चुहावट घटेको हो ।
३. सर्लाहीमा हिउँदे मकैमा फौजी किराको प्रकोप, किसान चिन्तित
सर्लाहीको उत्तरी चुरे क्षेत्रमा लगाइएको हिउँदे मकैबालीमा फौजी किराको प्रकोप बढेपछि किसान चिन्तित बनेका छन् ।
घारिबथान, परवानीपुर, पत्थरकोट, नारायणखोला र अत्रौलीलगायत क्षेत्रमा फौजी किराले मकैको पात र गुबो खाएर बोट नै नष्ट गर्न थालेको किसानले बताएका छन् ।
पछिल्ला केही वर्षदेखि बर्खे र हिउँदे दुवै यामको मकैमा फौजी किराको प्रकोप बढ्दै गएको किसानको भनाइ छ। यसका कारण उत्पादन घट्नुका साथै खेतीको लागतसमेत बढेको उनीहरूको गुनासो छ ।
४. कलैयामा ८ लाख ६२ हजारभन्दा बढीका कर छलीका सामान बरामद
बाराको कलैया उपमहानगरपालिका–४ स्थित एक घरमा छापा मार्दा ८ लाख रुपैयाँभन्दा बढी मूल्यका कर छलीका सामान बरामद भएका छन् ।
सशस्त्र प्रहरी बल, आन्तरिक राजस्व कार्यालय सिमरा र जिल्ला प्रहरी कार्यालय बाराको संयुक्त टोलीले विशेष सूचनाका आधारमा राजेश केशरीको घरमा खानतलासी गरेको हो ।
खानतलासीका क्रममा मोबाइलका सामान, इलेक्ट्रोनिक सामग्री, किराना तथा सुर्तीजन्य सामान बरामद गरिएको सशस्त्र प्रहरी नायब उपरीक्षक विक्रममणि अधिकारीले जानकारी दिनुभयो ।
बरामद सामानको कुल मूल्य ८ लाख ६२ हजार ८ सय ६५ रुपैयाँ रहेको छ।
५. निजगढमा श्रीमान्को कुटपिटबाट महिलाको मृत्यु
बाराको निजगढ नगरपालिका–१२, रामथलीमा श्रीमान्को कुटपिटबाट एक महिलाको मृत्यु भएको छ ।
मृत्यु हुनेमा ४७ वर्षीया सुकुमाया मोक्तान रहेकी छन् ।
प्रहरीका अनुसार घरायसी विवादका क्रममा ५५ वर्षीय श्रीमान् विजय मोक्तानले हिजो बेलुका सुकुमायालाई कुटपिट गरेका थिए ।
कुटपिटबाट सामान्य घाइते भएकी सुकुमायाको स्थानीय मेडिकलका चिकित्सक बोलाएर घरमै उपचार गरिएको थियो । तर, बिहान उनलाई मृत अवस्थामा फेला पारिएको प्रहरीले जनाएको छ ।
घटनाबारे प्रहरीले थप अनुसन्धान गरिरहेको जनाएको छ ।
