उदयपुरमा पिकअप जीप र सिटी सफारी एकआपसमा ठोक्किँदा दुई वर्षीया बालिकाको मृत्यु भएको छ भने एक ७० वर्षीया वृद्धा घाइते भएकी छन् ।
दुर्घटनामा त्रियुगा नगरपालिका–११ निवासी शिवकुमार सदाकी दुई वर्षीया छोरी रागिनी सदाको मृत्यु भएको हो । दुर्घटनामा गम्भीर घाइते भएकी रागिनीलाई उपचारका लागि जिल्ला अस्पताल उदयपुर लगिएको थियो। उपचारकै क्रममा उनको मृत्यु भएको प्रहरीले जनाएको छ ।
दुर्घटनामा सोही स्थानकी ७० वर्षीया कन्नि सदा घाइते भएकी छन्। उनको जिल्ला अस्पताल उदयपुरमा उपचार भइरहेको छ ।
शुक्रबार बिहान त्रियुगा नगरपालिका–११ स्थित फिल्म हलनजिक मदन भण्डारी लोकमार्गमा दुर्घटना भएको हो। आँखा अस्पतालबाट मेनचोकतर्फ जाँदै गरेको को.प्र.०५–००१ च ०१९० नम्बरको पिकअप जीपलाई सोही दिशाबाट आउँदै गरेको को.प्र.०५–००१ ह ०८७६ नम्बरको सिटी सफारीले पछाडिबाट ठक्कर दिएको प्रारम्भिक विवरणमा उल्लेख छ ।
दुर्घटनापछि प्रहरीले दुवै सवारीसाधन र चालकलाई नियन्त्रणमा लिएको छ। प्रारम्भिक अनुसन्धानका क्रममा सिटी सफारी चालकले मादक पदार्थ सेवन गरेको र आवश्यक कागजातसमेत साथमा नराखेको खुलेको छ ।
घटनाबारे प्रहरीले थप अनुसन्धान गरिरहेको जनाएको छ ।
