सशस्त्र प्रहरी बल पर्साले भारतबाट भन्सार छली गरी नेपाल भित्र्याइँदै गरेका १५ लाख २८ हजार ४२० रुपैयाँ बराबरका विभिन्न सामान बरामद गरेको छ ।
सशस्त्र प्रहरी बल नेपाल नं. १३ गण हेडक्वार्टर पर्साबाट खटिएको टोलीले वीरगंज महानगरपालिका–१६ स्थित भुटनदेवी मन्दिर नजिकको सीमा क्षेत्रबाट ९ लाख २२ हजार ५०० रुपैयाँ बराबरको औषधि नियन्त्रणमा लिएको हो । भारतबाट अवैध रूपमा भन्सार छली गरी ल्याइँदै गरेको अवस्थामा बरामद गरिएको उक्त औषधि आवश्यक कारबाहीका लागि वीरगञ्ज भन्सार कार्यालयमा बुझाइएको छ ।
त्यसैगरी, सोही गणबाट खटिएको अर्को टोलीले वीरगंज–१६ बाट ३ लाख २ हजार ९६० रुपैयाँ बराबरको मोटरसाइकल तथा तरकारी नियन्त्रणमा लिएको छ । बरामद सामान भन्सार कार्यालयमा बुझाइएको सशस्त्र प्रहरी बल नं. १३ गणका सशस्त्र प्रहरी नायब उपरीक्षक सुरज क्षेत्रीले जानकारी दिए ।
यसैगरी, सीमा सुरक्षा गुल्म वीरगञ्जबाट खटिएको टोलीले वीरगंज–१६ स्थित इनर्वा सीमा क्षेत्रबाट १ लाख ७७ हजार ८६० रुपैयाँ बराबरका कपडा तथा जुत्ता बरामद गरेको छ ।
त्यस्तै, पर्साको जगरनाथपुर गाउँपालिका–२ स्थित लक्ष्मीपुर चोकमा सीमा सुरक्षा गुल्म भिखमपुरबाट खटिएको टोलीले १ लाख २५ हजार १०० रुपैयाँ बराबरका सामानसहित मोटरसाइकल नियन्त्रणमा लिएको छ । उक्त सामानसमेत आवश्यक कारबाहीका लागि वीरगंज भन्सार कार्यालयमा बुझाइएको सशस्त्र प्रहरीले जनाएको छ ।
