सर्लाही । बेमौसमी वर्षाका कारण खेतमा काटेर सुकाउन राखिएको धान भिजेपछि सर्लाहीका किसान चिन्तित बनेका छन् । शुक्रबार रातिदेखि मेघगर्जनसहित वर्षा भइरहँदा धानबाली भिज्नुका साथै पाकेको धान काट्नसमेत समस्या भएको छ ।
यसअघि बिहीबार पनि वर्षा हुँदा खेतमा सुकाउन राखिएको धान भिजेको थियो । शुक्रबार रातिदेखि मौसम थप प्रतिकूल बनेपछि किसानलाई धानबाली भित्र्याउन कठिनाइ भएको हो ।
हरिवन नगरपालिका–५, घुर्कौलीका किसान टेकबहादुर पाख्रिनले फाट्टफुट्ट काटेर खेतमा राखेको धान वर्षाले भिजाएको बताउनुभयो । वर्षाका कारण पाकिसकेको थप धानसमेत काट्न नपाएको उहाँको भनाइ छ। मौसम खुल्ने प्रतीक्षामा रहेका किसान निरन्तरको झरीले समस्यामा परेका छन् ।
शुक्रबार राति सर्लाहीका केही स्थानमा भारी वर्षासमेत भएको छ। जल तथा मौसम विज्ञान विभागका अनुसार नवलपुरस्थित जलमापन केन्द्रमा ६१.२ मिलिमिटर र मनुषमारा जलमापन केन्द्रमा ५३.४ मिलिमिटर वर्षा मापन भएको छ ।
मौसम प्रतिकूल रहेकाले कृषि ज्ञान केन्द्र सर्लाहीले किसानलाई तत्काल धान नकाट्न आग्रह गरेको छ । केन्द्रका सूचना अधिकारी एवं बाली विकास अधिकृत कविन्द्रसिंह ठगुन्नाका अनुसार छिटो पाक्ने भदैया जातको धान काट्ने समय भए पनि मौसम खराब रहेकाले हतार नगर्न किसानलाई सुझाव दिइएको छ ।
यस वर्ष सर्लाहीमा ४१ हजार हेक्टर क्षेत्रफलमा धानखेती गरिएको ठगुन्नाले जानकारी दिनुभयो ।
यसैबीच, दसैँको मुखमा निरन्तर वर्षा हुँदा खोलामा बाढी आएको छ । बाढीका कारण चुरे क्षेत्रका स्थानीयवासीलाई लालबन्दी बजारसम्म आवतजावत गर्नसमेत कठिनाइ भएको छ। वर्षा र बाढीले एकातिर किसानको धानबाली प्रभावित बनेको छ भने अर्कोतिर स्थानीयको दैनिक आवागमनमा समस्या थपिएको छ ।
