प्रहरीले विराटनगरबाट ५२ ग्रामभन्दा बढी खैरो हेरोइनसहित दुई भारतीय नागरिकलाई पक्राउ गरेको छ ।
पक्राउ पर्नेमा भारतको बिहार राज्यअन्तर्गत अररिया जिल्लाको जोगबनी कुश्मा–७ निवासी १९ वर्षीय राजेश कुमार राय र ३५ वर्षीय राधाकृष्ण राय रहेका छन् ।
मोरङ प्रहरीका सूचना अधिकारी प्रहरी नायब उपरीक्षक (डीएसपी) मकेन्द्रकुमार मिश्रका अनुसार विराटनगर महानगरपालिका–१८ स्थित पेट्रोल पम्पअगाडिबाट आइतबार दिउँसो उनीहरूलाई पक्राउ गरिएको हो ।
इलाका प्रहरी कार्यालय रानी र लागुऔषध नियन्त्रण ब्यूरो विराटनगरबाट खटिएको संयुक्त प्रहरी टोलीले लागुऔषध कारोबार भइरहेको सूचनाका आधारमा उनीहरूलाई रोकेर जाँच गरेको थियो ।
जाँचका क्रममा साइकलको पछाडि बसेका राधाकृष्ण रायको साथबाट ५२ ग्राम १५० मिलिग्राम खैरो हेरोइन बरामद भएको प्रहरीले जनाएको छ ।
प्रहरीले लागुऔषध र साइकलसहित दुवै जनालाई नियन्त्रणमा लिएर इलाका प्रहरी कार्यालय रानीमा राखेको छ ।
घटनाबारे थप अनुसन्धान भइरहेको डीएसपी मिश्रले जानकारी दिएका छन् ।
