पर्सा प्रहरीले वीरगञ्ज महानगरपालिका वडा नं. १५ स्थित सञ्चालनमा रहेका होटलहरूमा वेश्यावृत्तिमा संलग्न गराएको अभियोगमा पक्राउ परेका दुईवटा संचालकलाई मानव बेचबिखनको मुद्दा चलाएको छ ।
जिल्ला प्रहरी कार्यालय पर्साबाट खटिएको प्रहरीटोलीले होटल स्मार्ट र न्यू शान्ति सैनिक होटलमा छापा मार्दा जबरजस्ती वेश्यावृत्तिमा संलग्न गराइएका चार महिलाको उद्धार गरेको थियो सोही घटनामा संलग्न संचालकद्वयलाई मानव बेचबिखनको मुद्दा चलाएको जिल्ला प्रहरी कार्यालय पर्साले जनाएको छ ।
सूचनाकाे अधारमा छापा मारेर होटल संचालकद्वय वीरगञ्ज महानगरपालिका वडा नं. १६ निवासी वर्ष ४५ का गिनीलाल गुप्ता र भारत, बिहार, पूर्वी चम्पारण जिल्ला, नकरदेही, भवानीपुर वडा नं. ६ निवासी वर्ष ४० का जयप्रकाश साहलाई पक्राउ गरेकाे थियाे । उनिहरू विरूद्ध वेश्यावृत्तिमा संलग्न गराएको अभियोगमा मुद्दा दर्ता गराई जिल्ला अदालतको आदेश अनुसार पुर्वपक्षका लागी कारागार चलान गरिएको जिल्ला प्रहरी कार्यालय पर्साका प्रहरी नायव उपरीक्षक तथा सूचना अधिकारी सुवास भट्टले जानकारी गराएका छन् ।
राम्रो आम्दानीको प्रलोभनमा वेश्यावृत्ति
प्रहरीका अनुसार, होटल सञ्चालकहरूले राम्रो आम्दानी गराइदिने प्रलोभन देखाएर महिलाहरूलाई जबरजस्ती वेश्यावृत्तिमा संलग्न गराउँदै आएका थिए । सोही कार्यमा संलग्न दुई जनालाई मानव बेचबिखन तथा ओसारपसार (नियन्त्रण) ऐन, २०६४ बमोजिम मुद्दा चलाइएको हो ।
पछिल्लो समय वीरगञ्जका विभिन्न होटल तथा लजहरूमा यौन व्यवसायसम्बन्धी अवैध गतिविधि बढ्दै गएको भन्दै प्रहरीले निगरानी बढाएकाे छ ।
