भारतको उत्तर प्रदेशमा प्रेमीसँग विवाह गर्न परिवारले अस्वीकार गरेपछि १८ वर्षीया युवती मोबाइल टावरमा चढेकी छन्। शुक्रबार बिहान भएको घटनामा प्रहरी र स्थानीयको पहलपछि दुवै परिवार विवाहका लागि सहमत भएका छन् । त्यसपछि मुम्बईमा रहेका प्रेमीसँग भिडियो कलमार्फत युवतीको निकाह सम्पन्न गरिएको हो ।
प्राप्त विवरणअनुसार मोतीपुर थाना क्षेत्रकी साइदा नामकी युवती सोही गाउँका २१ वर्षीय नुरुद्दिनसँग प्रेम सम्बन्धमा थिइन्। नुरुद्दिन रोजगारीका सिलसिलामा मुम्बईमा रहँदै आएका छन् । सामाजिक तथा समुदायगत भिन्नताका कारण दुवै पक्षका परिवार उनीहरूको विवाहको विपक्षमा थिए।
परिवारले विवाहका लागि सहमति नदिएपछि आक्रोशित साइदा शुक्रबार बिहान करिब ६ बजे गाउँकै मोबाइल टावरमा चढेकी थिइन् । घटनाबारे जानकारी पाएपछि प्रहरी, छिमेकी र गाउँले घटनास्थल पुगेका थिए। उनीहरूले युवतीलाई टावरबाट तल ओर्लिन आग्रह गरे पनि विवाह नगरी नओर्लिने अडान लिइन् ।
स्थिति नियन्त्रणमा लिन प्रहरीले दुवै पक्षका अभिभावकलाई बोलाएर छलफल गराएको थियो। करिब चार घण्टाको प्रयासपछि दुवै परिवार विवाहका लागि सहमत भए। त्यसपछि काजीलाई बोलाएर मुम्बईमा रहेका नुरुद्दिनसँग भिडियो कलमार्फत अनलाइन निकाह सम्पन्न गराइएको थियो ।
विवाह सम्पन्न भएपछि बिहान करिब १० बजे साइदा सुरक्षित रूपमा टावरबाट तल ओर्लिएकी थिइन्। मोतीपुर थानाका प्रहरी निरीक्षक ब्रह्मा गोन्डका अनुसार युवतीको सुरक्षालाई प्राथमिकतामा राख्दै स्थानीयको सहयोगमा घटनाको समाधान गरिएको हो ।
