प्राविधिक समस्याका कारण नेपाल प्रहरीका विभिन्न अनलाइन तथा डिजिटल सेवाहरू अवरुद्ध भएका छन् । प्रहरी प्रधान कार्यालयले बुधबार सूचना जारी गर्दै वेबसाइट तथा मोबाइल एपसहितका विभिन्न प्रणालीमा समस्या आएको जानकारी दिएको हो ।
नेपाल प्रहरीका अनुसार प्रहरीको आधिकारिक वेबसाइट, मोबाइल एप, अनलाइन भर्ना तथा छनोट प्रणाली र अनलाइन ट्राफिक नियम उल्लङ्घन जरिवाना भुक्तानी प्रणालीमा समस्या देखिएको छ। यसका कारण ती प्रणालीमार्फत प्रदान गरिने सेवाहरू प्रभावित भएका छन् ।
प्रहरीले प्राविधिक समस्या समाधानका लागि सम्बन्धित प्राविधिक टोली परिचालन गरिएको जनाएको छ । अवरुद्ध सेवाहरू पुनः सञ्चालनमा ल्याउन टोलीले काम गरिरहेको प्रहरी प्रधान कार्यालयले जानकारी दिएको छ ।
अनलाइन प्रणालीमा समस्या आए पनि आकस्मिक तथा आवश्यक सेवाका लागि टेलिफोन सम्पर्क माध्यमहरू भने खुला रहने प्रहरीले स्पष्ट पारेको छ ।
प्रहरीले अनलाइन सेवा अवरुद्ध हुँदा आवश्यक सहयोगका लागि सेवाग्राहीलाई उपलब्ध टेलिफोन सम्पर्क माध्यम प्रयोग गर्न आग्रह गरेको छ ।
