आगामी स्थानीय तह निर्वाचन नजिकिँदै गर्दा देशको प्रमुख आर्थिक नगरी वीरगंज महानगरपालिकामा राष्ट्रिय स्वतन्त्र पार्टी (रास्वपा) भित्र चुनावी चहलपहल तीव्र बनेको छ । पुराना दलहरूको कार्यशैलीप्रति असन्तुष्ट मतदाता र युवा पुस्तामाझ वैकल्पिक शक्तिको रूपमा उदाएको रास्वपाबाट मेयरको टिकट हात पार्न आकांक्षीहरूबीच आन्तरिक प्रतिस्पर्धा सुरु भएको हो ।
खासगरी पार्टीको प्रारम्भिक संगठन निर्माणमा खटिएका युवा नेतृत्व, क्षेत्रीय पदाधिकारीदेखि हालै पार्टी प्रवेश गरेका पूर्वमेयरसम्मले मेयर पदका लागि आ-आफ्नो दाबेदारी प्रस्तुत गरेपछि वीरगंज रास्वपाभित्र राजनीतिक सरगर्मी बढेको छ ।
मेयर पदका चार आकांक्षी: प्रोफाइल र राजनीतिक पृष्ठभूमि
नेतृत्व सम्हाल्न रास्वपाबाट हाल चर्चामा रहेका चार आकांक्षी चार ठाउँमा
1. सुधिर पटेल (महाधिवेशन प्रतिनिधि तथा युवा नेता):
जेनजी अान्दाेलनपछि रास्वपामा प्रवेश गरेका सुधिर पटेल चुनाव लड्ने अकांक्षा सहित मतदाताकाे टाेलटाेलमा पुगिरहेका छन्र । सामाजिक अभियानमा खटिँदै आएका सुधिर पटेल पार्टीभित्रका जुझारु युवा नेता हुन् । ‘नयाँ सोच र युवा नेतृत्व’ नै महानगरको आवश्यकता रहेको भन्दै उनले बलियो दाबेदारी प्रस्तुत गरेका छन् ।
2. तेज सम्शेर जबरा (क्षेत्रीय सभापति):
रास्वपाको क्षेत्रीय नेतृत्व सम्हालिरहेका जबरा समन्वयकारी भूमिका र स्थानीय तहसम्म पार्टीको नेटवर्क विस्तारमा लागिरहेकाे यूवा नेता हुन् । पार्टीको संगठनात्मक पदानुक्रम र निष्ठालाई आधार बनाएर उनले उम्मेदवारीमा दाबी गरेका छन् ।
3. विजय कुमार सरावगी (पूर्वमेयर तथा रास्वपा साधारण सदस्य):
वीरगंज महानगरपालिकाका प्रथम निर्वाचित पूर्वमेयर सरावगी औद्योगिक तथा व्यावसायिक पृष्ठभूमिका स्थापित व्यक्ति हुन् । तत्कालीन जसपाबाट मेयर बनेर पछि नेकपा (एमाले) को केन्द्रीय सदस्य रहेका सरावगी एमाले परित्याग गरी हालै रास्वपामा साधारण सदस्यका रूपमा जोडिएका छन् । महानगर हाँकिसकेको पूर्वअनुभव, स्थानीय व्यापारिक समुदायमा पकड र बलियो स्रोत-साधनका कारण उनको उपस्थितिले चुनावी प्रतिस्पर्धालाई थप रोचक बनाएको छ । यद्यपि, भर्खरै पार्टी प्रवेश गरेका कारण उनलाई टिकट दिने विषयमा पार्टीभित्रै कतिपय पुराना कार्यकर्ताको असन्तुष्टि समेत देखिन्छ ।
4. विशेष साह (जेन-जी संयोजक):
नयाँ पुस्ता (Gen-Z) का युवाहरूलाई संगठित गर्ने अभियानको नेतृत्व गरिरहेका साह नयाँ राजनीतिक सोचका साथ टाेलटाेलमा पुगिरहेका छन् । परम्परागत राजनीतिक वृत्तभन्दा बाहिर रहेका पहिलो पटक मतदान गर्ने (First-time voters) तथा युवा वर्गको मत आकर्षित गर्न सक्ने उम्मेदवारका रूपमा उनले आफूलाई प्रस्तुत गरिरहेकाे देखिन्छ ।
उम्मेदवार छनोटका चुनौती
वीरगंजमा रास्वपाको टिकट कसले पाउला भन्ने विषयले पार्टीको आन्तरिक लोकतन्त्र र आगामी चुनावी नतिजामा प्रत्यक्ष प्रभाव पार्ने देखिन्छ ।
संगठन निर्माणमा सुरुदेखि पसिना बगाएका सुधिर पटेल, तेज सम्शेर जबरा वा जेन-जी पुस्ताका विशेष साह जस्ता आन्तरिक नेतृत्वलाई प्राथमिकता दिने कि पूर्वमेयर सरावगीको अनुभव र स्रोतलाई सदुपयोग गर्ने भन्ने विषयमा पार्टीभित्र बहसमा रहेकाे छ । रास्वपाले उम्मेदवार छनोटमा 'प्राइमरी इलेक्सन' (आन्तरिक निर्वाचन) वा वैज्ञानिक विधि अवलम्बन गर्ने नीति लिएकाले साधारण सदस्यहरूको मत निर्णायक बन्ने देखिन्छ ।
परम्परागत दलहरू (कांग्रेस, एमाले र जसपा) को विकल्प खोजिरहेका वीरगंजवासीले रास्वपाबाट स्वच्छ, नयाँ र विकासप्रेमी अनुहारको अपेक्षा गरेका छन् । चारै जना आकांक्षीहरू यतिबेला कार्यकर्ता भेटघाट, आन्तरिक लबिइङ र स्थानीय नागरिकसँगको संवादमा सक्रिय बनेका छन् ।
