वीरगंज महानगरपालिका–३१ बेल्वा प्रसौनी टोलका विद्यालयहरूमा पछिल्लो चार वर्षदेखि पटक–पटक विवाद तथा व्यवस्थापकीय समस्या देखिँदै आए पनि शैक्षिक गतिविधिमा सुधार हुन नसकेको वडाध्यक्ष जितेन्द्र यादवले बताएका छन् ।
विद्यालयको भवन र भौतिक संरचना निर्माणमा ध्यान दिइए पनि नियमित पठनपाठन र शैक्षिक गुणस्तर सुधारमा सम्बन्धित निकायको ध्यान नपुगेको उनको आरोप छ ।
स्थानीय बासिन्दाका अनुसार विद्यालयहरूमा खाजा खाने समयमै बिदा हुने गरेको गुनासोसमेत छ । विद्यालयको नियमित सञ्चालन र पठनपाठन प्रक्रियामाथि प्रश्न उठ्दै आए पनि महानगरपालिकाले समस्या समाधानका लागि ठोस पहल नगरेको उनीहरूको भनाइ छ ।
वडाध्यक्ष यादवका अनुसार बेल्वा प्रसौनी टोलका विद्यालयसहित वडा नम्बर ३१ का विभिन्न विद्यालयमा लामो समयदेखि समस्या देखिँदै आए पनि समाधान हुन सकेको छैन । विद्यालय सञ्चालन तथा व्यवस्थापनसम्बन्धी कागजपत्रमा सबै प्रक्रिया पूरा भएको देखाइए पनि व्यवहारमा अवस्था फरक रहेको उनले दाबी गरेका छन् ।
यादवले विद्यालयमा देखिएका समस्या समाधानका लागि महानगरपालिकाको शिक्षा शाखा तथा सम्बन्धित अधिकारीको पटक–पटक ध्यानाकर्षण गराउँदा पनि प्रभावकारी पहल नभएको बताए । उनले शिक्षा शाखा प्रमुख आनन्द लामिछानेमाथि समेत आफ्नो जिम्मेवारी प्रभावकारी रूपमा निर्वाह नगरेको आरोप लगाएका छन् ।
विद्यालयको वास्तविक शैक्षिक अवस्था बुझ्न महानगरपालिकाको शिक्षा शाखाले हालसम्म एकपटक पनि अनुगमन नगरेको वडाध्यक्ष यादवको दाबी छ । उनका अनुसार विद्यालयको भवन र भौतिक संरचना राम्रो बनाएर मात्रै शैक्षिक सुधार सम्भव हुँदैन। त्यसका लागि नियमित पठनपाठन, शिक्षकको जिम्मेवारीप्रतिको जवाफदेहिता र प्रभावकारी अनुगमन आवश्यक हुन्छ ।
विद्यालयमा देखिएका विवाद अन्त्य गरी विद्यार्थीले नियमित रूपमा पढ्न पाउने वातावरण बनाउन महानगरपालिकाले तत्काल अनुगमन गरी आवश्यक सुधारका कदम चाल्नुपर्ने यादवको माग छ ।
