सरकारले आज र भोलि दुई दिन देशभरका बालबालिकालाई राष्ट्रिय भिटामिन ‘ए’ तथा जुकाको औषधि खुवाउने कार्यक्रम सञ्चालन गरिरहेको छ ।
कार्यक्रमअन्तर्गत ६ महिनादेखि ५९ महिनासम्मका बालबालिकालाई भिटामिन ‘ए’ क्याप्सुल र एक वर्षदेखि पाँच वर्षसम्मका बालबालिकालाई जुकाको औषधि खुवाइँदै छ ।
स्वास्थ्य सेवा विभागको पोषण शाखाका प्रमुख लीलाविक्रम थापाका अनुसार यस अभियानमार्फत करिब २१ लाख बालबालिकालाई भिटामिन ‘ए’ र करिब २० लाख बालबालिकालाई जुकाको औषधि खुवाउने लक्ष्य राखिएको छ ।
थापाले अभिभावकलाई आफ्ना बालबालिकालाई पायक पर्ने खोप केन्द्र वा वितरण केन्द्रमा लगेर निर्धारित समयमा औषधि खुवाउन आग्रह गरेका छन् ।
कार्यक्रम सफल बनाउन देशभर ५२ हजार महिला स्वास्थ्य स्वयंसेविका र १० हजार स्वास्थ्यकर्मी परिचालन गरिएका छन् ।
सरकारले बालबालिकाको पोषण अवस्था सुधार तथा स्वास्थ्य जोखिम न्यूनीकरण गर्ने उद्देश्यले प्रत्येक वर्ष कात्तिक र वैशाख महिनामा भिटामिन ‘ए’ र जुकाको औषधि निःशुल्क खुवाउँदै आएको छ ।
नेपालमा बालबालिकालाई भिटामिन ‘ए’ क्याप्सुल खुवाउने कार्यक्रम विसं २०५० देखि र जुकाको औषधि खुवाउने कार्यक्रम विसं २०५६ देखि नियमित रूपमा सञ्चालन हुँदै आएको छ ।
बालबालिकामा भिटामिन ‘ए’ को कमीबाट हुन सक्ने स्वास्थ्य समस्या, कुपोषण तथा जुकाको संक्रमणको जोखिम न्यूनीकरण गर्न यो कार्यक्रम सञ्चालन गरिँदै आएको स्वास्थ्य विभागले जनाएको छ ।
