सिरहा प्रहरीले विभिन्न समयमा बरामद गरेका करिब डेढ लाख रुपैयाँ मूल्य बराबरका पटाकाजन्य पदार्थ नष्ट गरेको छ ।
जिल्ला प्रहरी कार्यालय सिरहा तथा मातहतका प्रहरी कार्यालयहरूले विभिन्न समयमा गरेको कारबाहीका क्रममा नियन्त्रणमा लिएका पटाकाजन्य सामग्री नष्ट गरिएको हो ।
प्रहरीका अनुसार करिब १ लाख ५० हजार रुपैयाँ मूल्य बराबरका पटाकाजन्य पदार्थ सिरहा नगरपालिका–६ स्थित कमला नदीको किनारमा खाल्डो खनेर पुरिएको छ ।
बरामद गरिएका पटाकाजन्य पदार्थ स्थानीयवासी तथा पत्रकारहरूको रोहवरमा नष्ट गरिएको जिल्ला प्रहरी कार्यालय सिरहाले जनाएको छ ।
चाडपर्वका समयमा पटाकाको अवैध ओसारपसार, बिक्री वितरण तथा प्रयोगले आगलागी र विभिन्न दुर्घटनाको जोखिम बढाउने भएकाले प्रहरीले यस्ता गतिविधि नियन्त्रण गर्न निगरानी तथा कारबाहीलाई तीव्रता दिएको जनाएको छ ।
प्रहरीले पटाकाजन्य पदार्थको अवैध कारोबार तथा प्रयोग नगर्न सर्वसाधारणलाई आग्रहसमेत गरेको छ ।
