सिरहाको एक निजी विद्यालयमा अध्ययनरत साढे तीन वर्षीया बालिकामाथि जबर्जस्ती करणी गरेको आरोपमा विद्यालयकै एक शिक्षक पक्राउ परेका छन् ।
धनगढीमाई नगरपालिका–१० जिरोमाइलस्थित विश्वशान्ति एकेडेमीमा दैनिक प्रशासनको जिम्मेवारीसमेत सम्हाल्दै अध्यापन गराउँदै आएका करिब २५ वर्षीय सौगात लुइँटेललाई प्रहरीले पक्राउ गरेको हो ।
प्रहरीका अनुसार लुइँटेललाई गत मंगलबार जबर्जस्ती करणीसम्बन्धी कसुरमा पक्राउ गरिएको हो । उनलाई सिरहा जिल्ला अदालतबाट म्याद थप गरी थप अनुसन्धान भइरहेको जिल्ला प्रहरी कार्यालय सिरहाले जनाएको छ । पीडित बालिकाको धरानस्थित बीपी कोइराला स्वास्थ्य विज्ञान प्रतिष्ठानमा स्वास्थ्य परीक्षण गराई परिवारको जिम्मा लगाइएको प्रहरीले जनाएको छ ।
पीडित परिवारले प्रहरीमा दिएको जाहेरीअनुसार आरोपी शिक्षकले गत कात्तिक ८ देखि १२ गतेसम्म टिफिनको समयमा बालिकालाई कार्यालयमा बोलाएर चकलेट दिने तथा विभिन्न प्रलोभन देखाउँदै पटक–पटक यौन दुर्व्यवहार गरेको आरोप छ ।
परिवारका अनुसार कात्तिक १७ गते बालिकाले रुँदै आफूमाथि भइरहेको दुर्व्यवहारबारे बताएपछि घटना सार्वजनिक भएको थियो। बालिकालाई पिसाब गर्नसमेत कठिनाइ हुन थालेपछि सुरुमा स्वास्थ्य समस्याको आशंका गरिएको परिवारको भनाइ छ । केही दिन विद्यालय नपठाउँदा समस्या कम हुने र पुनः विद्यालय पठाउँदा दोहोरिने गरेको परिवारले जनाएको छ ।
कात्तिक १७ गते अस्पतालमा स्वास्थ्य परीक्षण गराउने क्रममा स्वास्थ्यकर्मीले जबर्जस्ती करणी भएको हुन सक्ने आशंका व्यक्त गरेपछि परिवारले बालिकासँग सोधपुछ गरेको र त्यसक्रममा उनले आरोपी शिक्षकले आफूमाथि गरेको दुर्व्यवहारबारे बताएको जाहेरीमा उल्लेख छ ।
जाहेरी फिर्ता लिन दबाब र धम्की दिएको परिवारको गुनासो
आरोपी शिक्षक पक्राउ परेपछि विद्यालय सञ्चालकले केही राजनीतिक दलका नेतामार्फत जाहेरी फिर्ता लिन पीडित परिवारलाई आर्थिक प्रलोभन देखाउँदै दबाब तथा धम्की दिएको परिवारको गुनासो छ ।
पीडित परिवारकी एक आफन्तका अनुसार प्रहरीमा किटानी जाहेरी दर्ता भई आरोपी पक्राउ परिसक्दा पनि आर्थिक प्रलोभन र विभिन्न किसिमका धम्की दिने क्रम नरोकिएको हो ।
यता, जिल्ला प्रहरी कार्यालय सिरहाका सूचना अधिकारी प्रहरी नायब उपरीक्षक रमेशबहादुर पालले पीडित परिवारले दिएको जबर्जस्ती करणीसम्बन्धी किटानी जाहेरी दर्ता गरी घटनाबारे अनुसन्धान भइरहेको जानकारी दिएका छन् ।
दोषीलाई कडा कारबाही गर्न मानव अधिकार सञ्जालको माग
विद्यालयमै नाबालिकामाथि यौन हिंसा भएको घटना सार्वजनिक भएपछि महिला मानव अधिकार रक्षक राष्ट्रिय सञ्जालले गम्भीर ध्यानाकर्षण भएको जनाएको छ ।
सञ्जालकी अध्यक्ष श्यामकुमारी साहले शुक्रबार प्रेस विज्ञप्ति जारी गर्दै घटनाको निष्पक्ष र प्रभावकारी अनुसन्धान गरी पीडित बालिकालाई न्याय सुनिश्चित गर्न माग गरेकी छन् ।
विज्ञप्तिमा अनुसन्धान तथा न्यायिक प्रक्रियामा कुनै पनि राजनीतिक, आर्थिक वा अन्य प्रकारको दबाब र प्रभाव पर्न नदिन सम्बन्धित निकायसँग आग्रह गरिएको छ। साथै, कानुनबमोजिम दोषी ठहर हुने व्यक्तिलाई हदैसम्मको कारबाही गर्न माग गरिएको छ ।
सञ्जालले पीडित बालिका तथा उनको परिवारको गोपनीयता, सुरक्षा र सम्मानलाई प्राथमिकता दिँदै आवश्यक स्वास्थ्य उपचार, मनोसामाजिक परामर्श तथा कानुनी सहायता उपलब्ध गराउनुपर्नेमा जोड दिएको छ ।
त्यस्तै, पीडित परिवारलाई न्याय प्राप्तिको प्रक्रियामा थप पीडा, धम्की, दबाब वा सामाजिक लाञ्छनाबाट संरक्षण गर्न स्थानीय सरकार, विद्यालय, प्रहरी तथा सम्बन्धित निकायलाई आग्रह गरिएको छ ।
बालबालिकामाथि हुने यौन हिंसा कुनै पनि अवस्थामा स्वीकार्य हुन नसक्ने उल्लेख गर्दै सञ्जालले घटनाको न्यायिक प्रक्रियामाथि निगरानी राख्दै पीडितको न्याय, सुरक्षा र सम्मानका पक्षमा निरन्तर आवाज उठाउने प्रतिबद्धता व्यक्त गरेको छ ।
