जनकपुरधाम । मधेस प्रदेशका मुख्यमन्त्री कृष्णप्रसाद यादवले पदबाट राजीनामा दिएसँगै प्रदेशमा नयाँ सरकार गठनको प्रक्रिया अघि बढेको छ ।
प्रदेश प्रमुख सुरेन्द्र लाभ कर्णले नेपालको संविधानको धारा १६८ को उपधारा (२) बमोजिम मुख्यमन्त्री नियुक्तिका लागि बहुमत जुटाउन सक्ने प्रदेशसभा सदस्यलाई दाबी पेस गर्न आह्वान गरेका छन् ।
मुख्यमन्त्री यादवले नेपालको संविधानको धारा १६९ को उपधारा (१) को खण्ड (क) बमोजिम पदबाट दिएको राजीनामा प्रदेश प्रमुख कर्णले आज स्वीकृत गरेका हुन् । राजीनामा स्वीकृत भएसँगै प्रदेश प्रमुखले नयाँ सरकार गठनको प्रक्रिया अगाडि बढाएका हुन् ।
संविधानको धारा १६८ को उपधारा (२) अनुसार प्रदेशसभामा प्रतिनिधित्व गर्ने दुई वा दुईभन्दा बढी दलको समर्थनमा बहुमत प्राप्त गर्न सक्ने प्रदेशसभा सदस्यलाई मुख्यमन्त्रीमा नियुक्त गर्ने व्यवस्था छ ।
सोही व्यवस्थाअनुसार प्रदेश प्रमुखको कार्यालयले मुख्यमन्त्री पदमा नियुक्तिका लागि आफ्नो पक्षमा बहुमत जुटाउन सक्ने प्रदेशसभा सदस्यलाई दाबी पेस गर्न आह्वान गरेको हो ।
प्रदेश प्रमुखको कार्यालयले इच्छुक प्रदेशसभा सदस्यलाई आगामी २०८३ साल मङ्सिर ४ गते शुक्रबार दिउँसो ४ बजेभित्र मधेस प्रदेशको मुख्यमन्त्री पदमा नियुक्तिका लागि दाबी पेस गर्न समयसीमा तोकेको छ ।
अब प्रदेशसभामा रहेका राजनीतिक दलहरूबीच नयाँ सरकार गठनका लागि सहमति र बहुमत जुटाउने राजनीतिक कसरत तीव्र हुने देखिएको छ ।