महोत्तरी । राष्ट्रिय स्वतन्त्र पार्टी (रास्वपा) का सभापति तथा पूर्वउपप्रधानमन्त्री रवि लामिछानेले आइतबार बिहान महोत्तरीको मटिहानीस्थित प्रसिद्ध लक्ष्मीनारायण मन्दिर र जलेश्वरनाथ महादेव मन्दिरमा पूजापाठ तथा दर्शन गरेका छन् ।
छठ पर्वमा सहभागी हुन जनकपुरधाम पुगेका लामिछाने आइतबार बिहान धनुषाको मुसहरनिया हुँदै मटिहानी पुगेका थिए । उनलाई मटिहानी नगरपालिकाका नगरप्रमुख हरिप्रसाद मण्डलले पुष्पगुच्छा, माला तथा मटिहानीको प्रसिद्ध मखना प्रदान गरेर स्वागत गरेका थिए ।
सो अवसरमा महोत्तरी निर्वाचन क्षेत्र नम्बर ३ का प्रतिनिधिसभा सदस्य उज्ज्वल झा, नेता पुरुषोत्तम यादव, बबलु गुप्ता तथा महोत्तरी निर्वाचन क्षेत्र नम्बर १ का प्रतिनिधिसभा सदस्य प्रमोद महतोलगायतको उपस्थिति रहेको थियो ।
मटिहानी पुगेपछि सभापति लामिछानेले वैष्णव सम्प्रदायको प्रमुख धार्मिक मठका रूपमा परिचित लक्ष्मीनारायण मठको अवलोकन गरेका थिए । उनले मठ परिसरमा रहेको प्रसिद्ध लक्ष्मीनारायण मन्दिरमा भगवान्को आरती तथा पूजापाठ गरेका थिए ।
मटिहानी नगरपालिकाका नगरप्रमुख हरिप्रसाद मण्डलका अनुसार लामिछानेले मठको अवलोकन गर्नुका साथै लक्ष्मीनारायण भगवान्को दर्शन र पूजापाठ गरेका थिए । मटिहानीमा भने उनले कुनै औपचारिक मन्तव्य दिएनन् ।
त्यसपछि लामिछाने लावालस्करसहित महोत्तरीको प्रसिद्ध जलेश्वरनाथ महादेव मन्दिर पुगेका थिए । त्यहाँ उनले भगवान् शिवको पूजापाठ तथा दर्शन गरेका थिए ।
रास्वपा महोत्तरीका जिल्ला अध्यक्ष शुभमकुमार यादवका अनुसार छठ पूजाका लागि जनकपुरधाम आएका पार्टी सभापति लामिछानेले आइतबार बिहान मटिहानी र जलेश्वरका धार्मिक स्थलमा पुगेर पूजापाठ तथा दर्शन गरेका हुन् ।
दर्शन तथा पूजापाठपछि सभापति लामिछाने पुनः जनकपुरधाम फर्किएका थिए ।