सिरहा । छठ पर्व मनाउन परिवारसहित गाउँ गएको मौका छोपी सिरहाको मिर्चैया नगरपालिका–१ मा अज्ञात समूहले घर तथा किराना पसलमा चोरी गरी आगजनी गरेको छ । आगलागीबाट १० लाख रुपैयाँभन्दा बढीको धनमाल जलेर नष्ट भएको छ ।
मिर्चैया नगरपालिका–१ स्थित शौर्य सिमेन्ट उद्योगको पूर्वपट्टि रहेको रामकुमार महतोको घर तथा घरमै सञ्चालित किराना पसलमा अज्ञात समूहले चोरी गरेपछि आगो लगाएर फरार भएको हो ।
छठ पर्व मनाउन घरपरिवार गाउँ गएको अवस्थामा चोरहरूले घर तथा पसलमा प्रवेश गरी सामान चोरी गरेका थिए । त्यसपछि पसलमा आगजनी गरी फरार भएको बताइएको छ ।
आगलागीबाट पसलभित्र रहेका सम्पूर्ण सामान जलेर नष्ट भएका छन् । आगो तीव्र रूपमा फैलिएपछि पसलमा राखिएको ग्यास सिलिन्डरसमेत विस्फोट भएको थियो ।
जिल्ला प्रहरी कार्यालय सिरहाका अनुसार उक्त घटनामा १० लाख रुपैयाँभन्दा बढीको सम्पत्ति जलेर नष्ट भएको छ ।
घटनामा संलग्न व्यक्तिहरूको पहिचान तथा चोरी र आगजनीको घटनाबारे प्रहरीले अनुसन्धान गरिरहेको जिल्ला प्रहरी कार्यालय सिरहाले जनाएको छ ।