सिरहा । घरेलु हतियार खुकुरी प्रदर्शन गर्दै अश्लील तथा डरत्रास फैलाउने अभिव्यक्तिसहित टिकटक भिडियो बनाएर सामाजिक सञ्जालमा पोस्ट गरेको आरोपमा सिरहामा एक युवक पक्राउ परेका छन् ।
पक्राउ पर्नेमा गोलबजार नगरपालिका–३ निवासी २१ वर्षीय महमद आशिक अन्सारी रहेका छन् । उनलाई इलाका प्रहरी कार्यालय गोलबजारबाट खटिएको प्रहरी टोलीले नियन्त्रणमा लिएको जिल्ला प्रहरी कार्यालय सिरहाले जनाएको छ ।
जिल्ला प्रहरी कार्यालय सिरहाका निमित्त प्रवक्ता नरेश लिम्बुका अनुसार अन्सारीले घरेलु हतियार खुकुरी प्रदर्शन गर्दै अश्लील भाषायुक्त अभिव्यक्ति र समाजमा आतंक तथा डरत्रास फैलाउने प्रकृतिको सामग्रीसहित टिकटक भिडियो बनाएका थिए ।
सामाजिक शान्ति भंग गर्ने तथा सर्वसाधारणमा डरत्रास फैलाउने गतिविधिमा संलग्न रहेको आरोपमा उनलाई पक्राउ गरी थप अनुसन्धान अघि बढाइएको प्रहरीले जनाएको छ ।
यसैबीच, सामाजिक सञ्जालमा अश्लील, डरत्रास फैलाउने, हतियार प्रदर्शन गरी धाकधम्की तथा रंगदारी झल्किने सामग्री पोस्ट गर्ने अन्य व्यक्ति तथा समूहसमेत प्रहरीको निगरानीमा रहेको जनाइएको छ ।
प्रहरीले यस्ता गतिविधिमा संलग्न नहुन र सामाजिक सञ्जालको प्रयोग गर्दा जिम्मेवार तथा सचेत रहन सर्वसाधारणलाई आग्रह गरेको छ ।