नेकपा (एमाले)का अध्यक्ष केपी शर्मा ओलीले जुनसुकै बेला आन्दोलन गर्नुपर्ने अवस्था आउन सक्ने भन्दै पार्टीका नेता तथा कार्यकर्तालाई तयारी अवस्थामा रहन निर्देशन दिएका छन् ।
मंगलबार काठमाडौंमा अखिल नेपाल किसान महासंघ केन्द्रीय कमिटीको विस्तारित बैठकलाई सम्बोधन गर्दै अध्यक्ष ओलीले आन्दोलन सधैँ लामो तयारी गरेर मात्रै नहुने बताए । परिस्थिति अति भएपछि तत्कालै आन्दोलन गर्नुपर्ने अवस्था आउन सक्ने उनको भनाइ थियो ।
ओलीले आतंकपूर्ण वातावरण र विभिन्न क्रियाकलापका कारण आफूहरू पछाडि धकेलिएको भए पनि सधैँ एउटै प्रकारको आतंक कायम नरहने बताए । आत्मविश्वास र उच्च मनोबलका साथ अगाडि बढ्नुपर्नेमा जोड दिँदै उनले चुनावको माध्यमबाट पार्टीलाई कमजोर बनाउन खोज्नेहरूलाई आगामी निर्वाचनमा पराजित गर्ने गरी अघि बढ्न नेता–कार्यकर्तालाई निर्देशन दिए ।
सोही क्रममा अध्यक्ष ओलीले सर्वोच्च अदालतको व्याख्या र आदेशप्रति असन्तुष्टि व्यक्त गरे । अघिपछि हतारमा फैसला गर्ने अदालतले प्रतिनिधिसभा विघटनसम्बन्धी मुद्दामा भने अहिलेसम्म फैसला गर्न नसकेको उनको टिप्पणी थियो ।
समयमै न्याय प्राप्त नहुनु र ढिलो न्याय प्राप्त हुनु भनेको न्याय नपाउनुजस्तै भएको उल्लेख गर्दै ओलीले अदालतका विषयमा थप टिप्पणी नगर्ने बताए । अदालतबारे धेरै बोल्दा आफूमाथि थप मानहानिको मुद्दा लाग्न सक्ने उनको भनाइ थियो ।
अध्यक्ष ओलीले जुनसुकै परिस्थिति आए पनि एमाले पुनः उठ्ने, पुनर्गठन हुने र अघि बढ्ने दृढता व्यक्त गरे । आगामी दिनमा जनताको घरदैलोमा पुग्ने, किसान तथा नागरिकसँग संवाद गर्ने र पार्टीलाई अझ सशक्त बनाउने अभियानमा जुट्न उनले नेता तथा कार्यकर्तालाई आग्रह गरे ।
एमालेलाई देशको निर्णायक राजनीतिक तथा लोकतान्त्रिक शक्तिका रूपमा स्थापित गर्न सबै नेता तथा कार्यकर्ता सक्रिय हुनुपर्नेमा ओलीले जोड दिए ।