रसुवाको भोटेकोशी नदीमा आएको बाढीबाट प्रभावित नागरिकको राहत तथा उद्धारका लागि सहयोग जुट्ने क्रम जारी रहेको छ । सरकारले सञ्चालन गरेका प्रधानमन्त्री दैवी प्रकोप उद्धार कोष र प्रधानमन्त्री राहत कोषमा विभिन्न क्षेत्रबाट आर्थिक सहयोग संकलन भइरहेको छ ।
प्रधानमन्त्री तथा मन्त्रिपरिषद्को कार्यालयका अनुसार दुवै कोषका विभिन्न खातामा बुधबार बिहान ९ बजेसम्म कुल १८ अर्ब ४७ करोड ८ लाख ७२ हजार ३९५ रुपैयाँ मौज्दात रहेको छ ।
कार्यालयले सार्वजनिक गरेको विवरणअनुसार प्रधानमन्त्री दैवी प्रकोप उद्धार कोषअन्तर्गत विभिन्न नौवटा वाणिज्य बैंकमा रहेको नेपाली रुपैयाँको मौज्दात १३ अर्ब ७३ करोड ६ लाख ७७ हजार ४३० रुपैयाँ पुगेको छ ।
त्यसैगरी, हिमालयन बैंक र लक्ष्मी सनराइज बैंकमा रहेका अमेरिकी डलर खातामा ३ करोड १७ लाख ५७ हजार ९७२ अमेरिकी डलर मौज्दात रहेको कार्यालयले जनाएको छ ।
रसुवाको भोटेकोशी नदीमा आएको बाढीबाट प्रभावित नागरिकको राहत, उद्धार तथा पुनःस्थापनाका लागि सरकारी कोषमा आर्थिक सहयोग जम्मा हुने क्रम जारी रहेको छ ।
सरकारले विपद् प्रभावितलाई राहत तथा उद्धारका लागि प्राप्त सहयोगलाई सम्बन्धित कोषमा जम्मा गर्ने व्यवस्था मिलाएको छ ।