मकवानपुरको भीमफेदी गाउँपालिका–१ भैंसेस्थित हेटौंडा–भैंसे सडकखण्डमा यात्रुवाहक सुमो दुर्घटना हुँदा तीन जनाको मृत्यु भएको छ भने सात जना घाइते भएका छन् ।
रौतहटको चन्द्रनिगाहपुरबाट काठमाडौं आउँदै गरेको ना.१ ज २१४३ नम्बरको यात्रुवाहक सुमो बिहीबार बिहान करिब ८ः३० बजे भैंसेस्थित घुम्तीमा अनियन्त्रित भई सडकबाट करिब १० मिटर तल भैंसे खोलामा खसेको थियो ।
दुर्घटनामा चालकसहित सुमोमा सवार १० जना घाइते भएका थिए । दुर्घटनालगत्तै प्रहरी, नेपाली सेना र सशस्त्र प्रहरी बलको टोली घटनास्थलमा पुगेर घाइतेहरूको उद्धार गरेको थियो । उद्धार गरिएका सबैलाई उपचारका लागि हेटौंडा अस्पताल पुर्याइएको थियो ।
हेटौंडा अस्पतालमा उपचारका क्रममा बिहान ९ः२० बजे चिकित्सकले तीन जनालाई मृत घोषणा गरेका हुन् । दुर्घटनामा घाइते भएका अन्य सात जनाको हेटौंडा अस्पतालमै उपचार भइरहेको छ ।
प्रहरीका अनुसार घाइतेहरूको अवस्था मध्यम रहेको छ । दुर्घटनाको कारणबारे थप अनुसन्धान भइरहेको छ ।