निवर्तमान प्रहरी महानिरीक्षक (आईजी) दानबहादुर कार्कीले सरकारको निर्णयविरुद्ध सर्वोच्च अदालतमा दायर गरेको रिट निवेदनमाथि सुनुवाइ सकिएको छ । रिटमाथि भएको बहस सकिएसँगै सर्वोच्च अदालतले केहीबेरमा आदेश सुनाउने तयारी गरेको छ ।
सर्वोच्च अदालतका न्यायाधीश श्रीकान्त पौडेलको एकल इजलासमा उक्त रिट निवेदनमाथि सुनुवाइ भएको हो ।
सरकारले गत कात्तिक १८ गते तत्कालीन प्रहरी महानिरीक्षक दानबहादुर कार्कीलाई जिम्मेवारीबाट हटाएर प्रधानमन्त्रीको सुरक्षा सल्लाहकारमा नियुक्त गरेको थियो । सोही दिन प्रहरी अतिरिक्त महानिरीक्षक (एआईजी) डा. मनोज केसीलाई प्रहरी महानिरीक्षकमा बढुवा गरिएको थियो ।
मन्त्रिपरिषद्को उक्त निर्णय गैरकानुनी रहेको र त्यसबाट आफू अन्यायमा परेको दाबी गर्दै कार्कीले सर्वोच्च अदालतमा रिट निवेदन दायर गरेका थिए ।
तिहार तथा छठ पर्वको बिदापछि मंगलबार अदालत खुलेसँगै सर्वोच्च अदालत प्रशासनले कार्कीको रिटमाथि प्रारम्भिक सुनुवाइका लागि पेसी तोकेको थियो ।
रिटमाथि दुवै पक्षको बहस सकिएपछि अब सर्वोच्च अदालतको आदेशलाई चासोका साथ हेरिएको छ ।