वीरगंज महानगरपालिका वडा नम्बर २४ स्थित बहुअरी टोलमा विकास निर्माणका नाममा बजेट खर्च भए पनि स्थानीयवासीले आधारभूत पूर्वाधारको समस्या भोग्नुपरेको छ । कतै सडक निर्माण गरिएको छ भने कतै नाला नै नहुँदा बस्तीको अवस्था अस्तव्यस्त बनेको स्थानीयको गुनासो छ।
स्थानीयवासीका अनुसार महानगरपालिका बनेको करिब १० वर्ष बितिसक्दा पनि बहुअरी टोलको सडक, नाला तथा पानी निकासको समस्या समाधान हुन सकेको छैन । महानगरपालिकाले विभिन्न शीर्षकमा कर उठाउँदै आए पनि त्यसअनुसार विकासको अनुभूति गर्न नपाएको भन्दै स्थानीयले असन्तुष्टि व्यक्त गरेका छन् ।
स्थानीयको भनाइअनुसार करोडौँ रुपैयाँ खर्च गरेर विभिन्न संरचना निर्माण गरिएका छन् भने टोलमा ठाउँ–ठाउँमा ६ वटा गेटसमेत बनाइएको छ । तर, बस्तीका नागरिकलाई प्रत्यक्ष असर गर्ने सडक र नाला व्यवस्थापनमा भने अपेक्षित ध्यान दिइएको छैन। कतै नाला निर्माण गरिएको छ भने कतै नालाको नामोनिसानसमेत छैन । जसका कारण पानी निकासमा समस्या हुनुका साथै दैनिक आवतजावतमा समेत स्थानीयले सास्ती भोग्नुपरेको छ ।
बजेट खर्च भयो, जनताले विकास कहिले महसुस गर्ने ?
विकास निर्माणका नाममा रकम खर्च भइरहेको भए पनि टोलको वास्तविक समस्या समाधान नहुनुले स्थानीयवासीले वडा कार्यालय र महानगरपालिकाको विकास योजनामाथि प्रश्न उठाएका छन् । सडक र नाला निर्माणलाई एकीकृत योजनाअनुसार अघि बढाउनुपर्नेमा टुक्रे तथा असमान विकासले समस्या थप जटिल बनाएको उनीहरूको आरोप छ ।
स्थानीयको गुनासो पूर्वाधारमा मात्रै सीमित छैन। बहुअरी टोलमा विगत करिब १० वर्षदेखि आपसी विवाद, गुटबन्दी र लफडाका कारण सामाजिक सद्भावसमेत कमजोर बन्दै गएको उनीहरूले बताएका छन् । गाउँमा एकअर्काप्रतिको विश्वास, आपसी समझदारी र सद्भाव बिग्रिँदै गएको भन्दै स्थानीयले चिन्ता व्यक्त गरेका छन् ।
नेता आउँछन्, आश्वासन दिन्छन्, तर समस्या किन समाधान हुँदैन ?
स्थानीयवासीले वडा अध्यक्ष तथा वीरगंज महानगरपालिकाका मेयरको ध्यानाकर्षण गराउँदै बहुअरी टोलको वास्तविक अवस्था बुझ्न स्थलगत अनुगमन गर्न माग गरेका छन् । विकासका नाममा बजेट खर्च गर्ने तर जनताका आधारभूत समस्या वर्षौँसम्म समाधान नगर्ने प्रवृत्तिको अन्त्य हुनुपर्ने उनीहरूको भनाइ छ ।
स्थानीयले सडक, नाला र पानी निकासको दीर्घकालीन समाधानका लागि एकीकृत योजना बनाएर तत्काल काम अघि बढाउन माग गरेका छन् ।
अब प्रश्न उठेको छ– वीरगंज महानगरपालिकाको वडा नम्बर २४ स्थित बहुअरी मा वर्षौँदेखि नाला र सडकको समस्या किन समाधान हुन सकेन? विकासका नाममा खर्च भएको बजेटले बहुअरीका जनतालाई के उपलब्धि दियो ? वडा अध्यक्ष र मेयरले स्थानीयको यो गुनासो कहिलेसम्म बेवास्ता गर्ने ?
बहुअरी टोलका नागरिकको प्रश्नको जवाफ भाषण र आश्वासनले होइन, देखिने विकास र समस्याको समाधानले दिनुपर्ने आवश्यकता देखिएको छ ।