काठमाडौं । स्वास्थ्य सचिव नियुक्ति प्रक्रियासम्बन्धी रिटमा सर्वोच्च अदालतले नियुक्ति निर्णयको फाइल झिकाउन आदेश दिएको छ । स्वास्थ्य तथा जनसंख्या मन्त्रालयकी अतिरिक्त सचिव डा. संगीता कौशल मिश्राले दायर गरेको रिटमा बिहीबार पनि सुनुवाइ भएको थियो ।
न्यायाधीश तिल प्रसाद श्रेष्ठ र महेश शर्मा पौडेलको संयुक्त इजलासले सचिव नियुक्तिको निर्णय फाइल झिकाउन प्रधानमन्त्री तथा मन्त्रिपरिषद् कार्यालयलाई आदेश दिएको हो ।
वरिष्ठताको क्रममा अगाडि भए पनि आफूलाई स्वास्थ्य सचिवमा नियुक्त नगरिएको भन्दै डा. मिश्राले चैत १ गते सर्वोच्च अदालतमा रिट दायर गरेकी थिइन् । उनको रिटमाथि चैत ३ गते न्यायाधीश बालकृष्ण ढकालको एकल इजलासमा पहिलो सुनुवाइ भएको थियो, जसमा सरकारका नाममा कारण देखाऊ आदेश जारी गरिएको थियो ।
२१ फागुनमा बसेको मन्त्रिपरिषद् बैठकले अतिरिक्त सचिव डा. विकास देवकोटालाई सचिवमा बढुवा गर्ने निर्णय गरेको थियो । तर, मिश्राले आफूभन्दा जुनियरमा परेका व्यक्तिको मातहतमा काम नगर्ने बताएकी थिइन् ।