काठमाडौं । चोरीका २७१ थान मोबाइलसहित प्रहरीले सात जनालाई पक्राउ गरेको छ ।
जिल्ला प्रहरी परिसर काठमाडौंको टोलीले काभ्रे, रौतहट, दोलखा, सिन्धुपाल्चोक र काठमाडौंका सात जनालाई पक्राउ गरेको हो । पक्राउ पर्नेहरूमा प्रमोद परियार, गुनराज न्यौपाने, हेमन्त राना मगर, शम्भु विश्वकर्मा, राजेश चालिसे, सबिन पाण्डे र प्रकाश कटवाल छन् ।
पक्राउ परेकाहरूको साथबाट विभिन्न ब्रान्डका २७१ थान मोबाइल, १५ थान ल्यापटप र ९ थान ट्याब बरामद गरिएको एसपी अपिलराज बोहोराले जानकारी दिए। बरामद मोबाइलमध्ये १८ थान आइफोन रहेको छ ।
बुधबार ठिमीबाट कोटेश्वर आउँदै गरेका यात्रुको सार्वजनिक बसमा पाकेटमारी भएको सूचना पाएपछि अनुसन्धान थालिएको थियो । पक्राउ परेका व्यक्तिहरू भक्तपुरको जगातीस्थित सरोज मोबाइल रिपेयरिङ सेन्टरमा चोरीका मोबाइल बिक्री गर्ने गरेको खुलेको प्रहरीले जनाएको छ ।
प्रहरीले घटनाबारे थप अनुसन्धान गरिरहेको छ ।
