एक वर्षदेखि परिवारबाट सम्पर्कविहीन रहेकी एक महिलाको मानवसेवा आश्रम वीरगञ्जको पहलमा सफल पारिवारिक पुनर्मिलन भएको छ ।
इलाका प्रहरी कार्यालय प्रसौनी, बाराले उद्धार गरी २०८३ साल असोज ७ गते बुधबार राति करिब १० बजे मानवसेवा आश्रम वीरगंजमा पुर्याएकी ती महिलालाई परिवारको पहिचान खुलेपछि उनका भाइ सोहन रायको जिम्मा लगाइएको हो । आश्रमका अनुसार ती महिला भारतको बिहार राज्यस्थित मोतिहारी जिल्ला, राजेपुर थाना, मोहम्मदपुर सागर गाउँकी हुन्। उनी विगत करिब एक वर्षदेखि परिवारको सम्पर्कबाट टाढा रहेकी थिइन् ।
महिलाको परिवार पहिचान गरी पुनर्मिलन गराउन मानवसेवा आश्रम वीरगञ्जले निरन्तर खोजी तथा समन्वय गरेको थियो। खोजीका क्रममा परिवारसँग सम्पर्क स्थापित भएपछि उनलाई भाइ सोहन रायको जिम्मा लगाइएको आश्रमले जनाएको छ । मानवसेवा आश्रमका संस्थापक अभियन्ता देवेश गुप्ताले यस घटनाबारे जानकारी दिँदै परिवारसँग पुनर्मिलन गराउन सक्नु आश्रमको उद्देश्य र सेवाकार्यको महत्वपूर्ण उपलब्धि भएको बताउनुभयो।
महिलाको उद्धारमा सहयोग गर्ने इलाका प्रहरी कार्यालय प्रसौनी, बारा, मानवसेवा आश्रम वीरगञ्ज तथा परिवारको खोजीमा समन्वयकारी भूमिका निर्वाह गर्ने सामाजिक अभियन्ता विनय कुमारलगायत सम्पूर्ण सहयोगीप्रति आश्रमले आभार व्यक्त गरेको छ ।
मानवसेवा आश्रमले सडक तथा सार्वजनिक स्थानमा अलपत्र अवस्थामा भेटिएका व्यक्तिहरूको उद्धार, संरक्षण, उपचार तथा परिवार पहिचान गरी पुनर्मिलन गराउँदै आएको छ ।
भिडियाे रिपाेर्ट
