काठमाडौँ । मेडिकल व्यवसायी दुर्गा प्रसाईँका दुवै अस्पतालको बैंक खाता फुकुवा गर्न सर्वोच्चले आदेश दिएको छ ।
गत चैत १५ गते तिनकुनेमा आतंक मच्याएको भन्दै प्रहरीले उनलाई पक्राउ गरेको छ । उनी पक्राउ भएपछि उनको व्यक्तिगत साथै वि एण्ड सी मेडिकल कलेज टिचिङ्ग हस्पिटल एण्ड रिसर्च सेन्टर प्रालि र पूर्वाञ्चल क्यान्सर हस्पिटल प्रालिको समेत खाता रोक्का गरिएको थियो ।
सो निर्णयविरुद्ध दुवै अस्पतालका तर्फबाट अपरेशन डाइरकेक्टर डा अञ्जली कार्कीले सवोच्चमा रिट दायर गरेकी थिइन् । सो रिटउपर सुनुवाइ गर्दै न्यायाधीश हरिप्रसाद फुयालको एकल इजलासले दुवै खाता फुकुवा गर्न अन्तरिम आदेश दिएको हो ।
त्यस्तै नेपाल प्रहरी र केन्द्रीय अनुसन्धान ब्युरोलाई विपक्षी बनाएर दायर गरेको रिटमा सर्वोच्च अदालतले बैंक खाता फुकुवासँगै कारण देखाउ आदेश पनि जारी गरेको छ ।
