नागढुंगा–सिस्नेखोला सुरुङमार्ग प्रयोग गर्ने सवारीसाधनले आज (कात्तिक १५) देखि सडक उपभोग दस्तुर अर्थात् टोल शुल्क तिर्नुपर्ने भएको छ । सुरुङमार्ग निर्माण आयोजनाले सवारीसाधनको प्रकार र काठमाडौं प्रवेश तथा बाहिरिने दिशाअनुसार फरक–फरक शुल्क निर्धारण गरेको छ ।
नागढुंगा सुरुङमार्ग निर्माण आयोजनाले कात्तिक १२ गते सार्वजनिक सूचना जारी गर्दै नयाँ शुल्क दरबारे जानकारी गराएको हो । नेपाल राजपत्रमा २०८२ चैत २६ गते प्रकाशित सूचनाका आधारमा शुल्क संकलन सुरु गर्न लागिएको आयोजनाले जनाएको छ ।
निर्धारित दरअनुसार सुरुङमार्ग हुँदै काठमाडौं प्रवेश गर्ने कार तथा भ्यानले ६५ रुपैयाँ र काठमाडौं बाहिरिने क्रममा ६० रुपैयाँ टोल शुल्क तिर्नुपर्नेछ ।
त्यस्तै, मिनिबस तथा मिनिट्रकले काठमाडौं प्रवेश गर्दा ११५ रुपैयाँ र बाहिरिँदा ८० रुपैयाँ तिर्नुपर्नेछ। बस तथा ट्रकका लागि काठमाडौं प्रवेश गर्दा २६० रुपैयाँ र बाहिरिँदा २०० रुपैयाँ शुल्क निर्धारण गरिएको छ ।
यसैगरी, हेभी सवारीसाधनले काठमाडौं प्रवेश गर्दा ६०० रुपैयाँ र बाहिरिने क्रममा २५० रुपैयाँ टोल शुल्क बुझाउनुपर्नेछ ।
कुन सवारीसाधनलाई कति शुल्क ?
सवारीसाधन काठमाडौं प्रवेश काठमाडौं बाहिरिने
कार तथा भ्यान ६५ रुपैयाँ ६० रुपैयाँ
मिनिबस तथा मिनिट्रक ११५ रुपैयाँ ८० रुपैयाँ
बस तथा ट्रक २६० रुपैयाँ २०० रुपैयाँ
हेभी सवारीसाधन ६०० रुपैयाँ २५० रुपैयाँ
सुरुङमार्ग प्रयोग गर्ने सवारीसाधनले डिजिटल माध्यमबाट शुल्क भुक्तानी गर्नुपर्ने व्यवस्था गरिएको छ । यसका लागि रेडियो फ्रिक्वेन्सी आइडेन्टिफिकेसन (आरएफआईडी) प्रविधिमा आधारित एन ट्याग प्रयोग गरिनेछ ।
सडक बोर्ड नेपालका अनुसार सवारीसाधनले बैंकबाट एन ट्याग कार्ड प्राप्त गरी सुरुङमार्गको शुल्क भुक्तानी गर्न सक्नेछन् । डिजिटल भुक्तानी प्रणालीमार्फत टोल शुल्क संकलनलाई सहज र व्यवस्थित बनाउने उद्देश्य राखिएको छ ।
