अख्तियार दुरुपयोग अनुसन्धान आयोगले भक्तपुरको मध्यपुर थिमि नगरपालिकाका प्रमुख प्रशासकीय अधिकृत भोजराज घिमिरेलाई घुस रकमसहित नियन्त्रणमा लिएको छ ।
सोमबार अपराह्न आयोगको टोलीले घिमिरेलाई ३० लाख रुपैयाँभन्दा बढी घुस लिइरहेको अवस्थामा रंगेहात नियन्त्रणमा लिएको अख्तियार स्रोतले जनाएको छ ।
अख्तियारका अनुसार घटनास्थलबाट बरामद भएको रकमको गणना गर्ने तथा मुचुल्का उठाउनेलगायतका कानुनी प्रक्रिया अगाडि बढाइएको छ ।
अख्तियार स्रोतले प्रमुख प्रशासकीय अधिकृतलाई नियन्त्रणमा लिइएको पुष्टि गर्दै बरामद रकमको गणना भइरहेको जनाएको छ ।
यस घटनाबारे अख्तियार दुरुपयोग अनुसन्धान आयोगले औपचारिक रूपमा थप विवरण सार्वजनिक गर्न बाँकी रहेको छ ।
