बिचौलिया र न्यायाधीशहरूको नाम जोडिएर पछिल्लो समय सार्वजनिक भएका समाचारका विषयमा निष्पक्ष छानबिन गरी यथाशीघ्र सत्यतथ्य सार्वजनिक गर्न सर्वोच्च अदालतले सम्बन्धित निकायलाई आग्रह गरेको छ ।
आज बसेको सर्वोच्च अदालतको फुलकोर्ट (पूर्ण) बैठकले प्रधानन्यायाधीश तथा न्यायाधीशहरूको नाम जोडेर पछिल्लो समय प्रकाशित तथा प्रसारित समाचारप्रति आफ्नो ध्यानाकर्षण भएको जनाएको हो ।
बैठकले सार्वजनिक रूपमा आएका विषयमा कुनै पूर्वाग्रह नराखी निष्पक्ष र स्वतन्त्र रूपमा संविधान तथा कानुनबमोजिम छानबिन गर्न सम्बन्धित निकायलाई आग्रह गरेको छ ।
सर्वोच्च अदालतको निर्णयमा भनिएको छ, ‘सार्वजनिक रूपमा प्रकाशित र प्रसारित विषयका सम्बन्धमा बिना पूर्वाग्रह, निष्पक्ष एवं स्वतन्त्र ढंगबाट संविधान र कानुनबमोजिम छानबिन गरी सत्य, तथ्यसहितको निष्कर्ष यथाशीघ्र सार्वजनिक गर्न सम्बन्धित निकायलाई आग्रह गर्दछौँ ।’
न्यायाधीश र बिचौलिया इनम सापकोटाबीच भएको भनिएको कुराकानी तथा प्रधानन्यायाधीश मनोजकुमार शर्माको नामसमेत जोडिएर समाचार सार्वजनिक भएपछि न्यायालयभित्र यस विषयले चर्चा र तरंग सिर्जना गरेको छ ।
यही विषयमा छलफल गर्न आज बिहान ९ बजेदेखि सुरु भएको पूर्ण बैठक केहीबेरअघि सम्पन्न भएको हो । बैठकमा प्रधानन्यायाधीश मनोजकुमार शर्मासहित सर्वोच्च अदालतका सबै बहालवाला न्यायाधीश सहभागी थिए ।
यसैबीच, छानबिनको निष्कर्ष प्राप्त नहुँदै कसैलाई लाञ्छित गर्ने वा न्याय सम्पादनको कार्यमा अवरोध पुग्ने किसिमका समाचार प्रकाशन तथा प्रसारण नगर्न पनि सर्वोच्च अदालतले सञ्चारमाध्यमलाई आग्रह गरेको छ ।
