बर्दिवास — बर्दिवास–२ हङकङडाँडामा निर्माणाधीन ‘हाम्रो माया घर’ले तीव्र गति लिएको छ ।
असहाय, अशक्त, बेसहारा र सडक मानवलाई आश्रय दिने उद्देश्यले निर्माण भइरहेको उक्त सामाजिक संरचनाको करिब ५० प्रतिशत काम सम्पन्न भइसकेको निर्माण समितिले जनाएको छ । मधेस प्रदेशका मुख्यमन्त्री सतिशकुमार सिंहद्वारा नौ महिनाअघि शिलान्यास गरिएको ‘हाम्रो माया घर’ निर्माणमा हालसम्म उल्लेख्य प्रगति भएको छ ।
निर्माण समितिका अध्यक्ष शम्भुप्रसाद भट्टराईका अनुसार करिब रु १० करोड ६९ लाखको लागतमा दुईवटा भवन निर्माण गरिनेछ, र दुई वर्षभित्र पूर्ण रूपमा सम्पन्न गर्ने लक्ष्य लिइएको छ । शिवपुराण महायज्ञमार्फत रु दुई करोड संकलन गरी पहिलो चरणको निर्माण थालिएको हो। त्यसयता विभिन्न दाताबाट प्राप्त सहयोगमार्फत काम अघि बढाइएको छ । हालै मात्र बर्दिवास नगरपालिकाका प्रमुख प्रहलादकुमार क्षेत्रीले रु २५ लाख सहयोगको घोषणा गरेका छन् भने ॐ समाज डेन्टल अस्पतालका सञ्चालक डा. सुवास घिमिरेले रु ७ लाख ५० हजार सहयोग उपलब्ध गराएका छन् ।
अध्यक्ष भट्टराईका अनुसार, पहिलो भवन निर्माण सम्पन्न गरी प्रयोगमा ल्याइनेछ, त्यसपछि दोस्रो भवनको काम थालिनेछ । पाँच कठ्ठा १० धुर जग्गा निःशुल्क प्राप्त भइसकेको छ । ‘हाम्रो माया घर’मा मधेसका विभिन्न स्थानबाट भेटिने सडक मानव, असहाय बालबालिका, अशक्त र परिवारबाट हेपिएका वा त्यागिएका वृद्धवृद्धाहरूलाई सुरक्षित आश्रय प्रदान गरिनेछ ।
'दुई सय जना सम्मको मानवोचित व्यवस्थापनसहितको आश्रय दिने लक्ष्य लिइएको छ', समितिका अर्का अध्यक्ष कृष्णप्रसाद गौतमले जानकारी दिए। बालबालिका र अपांगमैत्री सुविधा हुनेगरी भवन निर्माण भईरहेको छ। त्यहाँ बालबालिकाका लागि खेलकुद, मनोरञ्जन र विद्यालय शिक्षासम्मको समावेश गरिने बताइएको छ ।
‘हाम्रो माया घर’ सामाजिक उत्तरदायित्वप्रति दाताहरुको सहयोग, स्थानीयको समर्थन र संस्थागत प्रयासको उदाहरणीय पहल बनेको छ ।
भिडियाे सामाग्री
