नेकपा (माओवादी केन्द्र) ले मध्य पहाडी लोकमार्ग केन्द्रित दोस्रो चरणको जागरण अभियान स्थगन गर्ने निर्णय गरेको छ । मौसम पूर्वानुमान महाशाखाले कोशी प्रदेशसहित मध्य पहाडी क्षेत्रमा भारी वर्षाको सम्भावना जनाएको र केही स्थानमा सडक क्षतिग्रस्त रहेको जानकारीपछि सो निर्णय गरिएको हो ।
माओवादी केन्द्रको केन्द्रीय कार्यालयका मुख्य सचिव गणेशमान पुनका अनुसार अभियान हाललाई रोकिएको छ। पुनले बताएअनुसार, वर्षाका कारण सडकमा यात्रा जोखिमपूर्ण भएको र सावधानी स्वरूप यस्तो निर्णय गर्नुपरेको हो ।
“कोशी प्रदेशलगायत मध्य पहाडी क्षेत्रका विभिन्न भागमा भारी वर्षाको सम्भावना रहेको मौसम विभागले बताएको छ। सडकको अवस्थासमेत कमजोर भएकाले आजदेखि २५ गतेसम्मको अभियान रोकिने निर्णय गरिएको हो,” पुनले स्पष्ट पारे ।
पूर्वनिर्धारित तालिका स्थगित
यसअघि जेठ १६ गते बसेको माओवादी पदाधिकारी बैठकले अभियान जेठ २१ देखि २५ गतेसम्म सञ्चालन गर्ने निर्णय गरेको थियो। तर सोमबार पार्टीले सबै संगठनहरूलाई पठाएको परिपत्रमा नयाँ तालिका नराखिएको उल्लेख गरिएको छ । पुनका अनुसार मौसम प्रतिकूलताकै कारण कार्यतालिका परिवर्तन गरिएको हो ।
पहिलो चरणको अभियान सम्पन्न
यसअघि पहिलो चरणको जागरण अभियान जेठ २ गते बैतडीको पाटन बजारबाट सुरु भई पोखरामा सम्पन्न भएको थियो। उक्त अभियानको उद्देश्य संगठन सुदृढीकरण, पार्टीको नीति प्रचार तथा मध्य पहाडी लोकमार्गको महत्त्वबारे जनचेतना फैलाउने रहेको माओवादी नेताहरूले बताएका थिए ।
