टोखामा गाेली चल्याे, दुई प्रहरी घाइते

राष्ट्रिय

Home
राष्ट्रिय
टोखामा गाेली चल्याे, दुई प्रहरी घाइते

टोखामा गाेली चल्याे, दुई प्रहरी घाइते

काठमाडौंको टोखा नगरपालिकास्थित ग्राण्डी अस्पताल नजिकै प्रहरीले गोली चलाएर दुई जना लागुऔषध कारोबारीलाई नियन्त्रणमा लिएको छ ।

कारोबारीलाई नियन्त्रणमा लिने क्रममा दुई जना प्रहरी घाइते भएका छन् । लागुऔषध नियन्त्रण ब्यूरो, कोटेश्वरबाट खटिएको प्रहरी टोलीले गम्भीर सूचना पाएपछि उक्त स्थानमा अपरेशन सञ्चालन गरेको थियो । ब्यूरोका इन्स्पेक्टर राकेश यादव र वरिष्ठ सई बालकृष्ण सञ्जेल नेतृत्वको टोलीले कारोबारी पक्राउ गर्न खोज्दा झडपको अवस्था सिर्जना भएको प्रहरीले जनाएको छ । प्रहरीमाथि आक्रमण भएपछि जवाफी कारबाहीस्वरूप गोली चलाइएको थियो। त्यसक्रममा दुई जना कारोबारीलाई नियन्त्रणमा लिइएको छ ।

उनीहरूको साथबाट १ सय ५० ग्रामभन्दा बढी ब्राउन सुगर बरामद गरिएको ब्यूरोले जानकारी दिएको छ ।

दुई प्रहरी घाइते

ब्यूरोका प्रमुख एसएसपी कृष्ण कोइरालाका अनुसार झडपमा परी प्रहरी जवान रवीन्द्र केसी र नवराज घिसिङ घाइते भएका छन् । घाइतेहरूको अहिले काठमाडौंस्थित अस्पतालमा उपचार भइरहेको छ। उनीहरूको स्वास्थ्य अवस्था खतरामुक्त रहेको बताइएको छ ।

प्रहरीका अनुसार पक्राउ परेका व्यक्तिहरूको पहिचान खुलाइएको छैन । उनीहरूमाथि लागुऔषध कारोबारमा संलग्न रहेको प्रारम्भिक प्रमाण भेटिएकाले थप अनुसन्धान भइरहेको छ ।