प्रेम सम्बन्धको विरोध गर्दै एक युवतीलाई जबर्जस्ती विषादी खुवाइएको घटना सप्तरीको हनुमाननगर कंकालिनी नगरपालिका–२ मा सार्वजनिक भएको छ ।
२० वर्षीया सनिसा खंगमाथि भएको यो घटनापछि उनको अवस्था गम्भीर रहेको छ भने गर्भमा रहेको चार महिनाको बच्चा खेरिएको छ । स्थानीय गजेन्द्रनारायण सिंह अस्पतालको बेड नम्बर २६ मा उपचाररत सनिसा खंगले दिएको जानकारी अनुसार उनी र सोही स्थानका २३ वर्षीय शिवजी खंगबीच लामो समयदेखि प्रेम सम्बन्ध थियो । सम्बन्धकै क्रममा शारीरिक सम्पर्क भएपछि उनी गर्भवती बनेकी थिइन् ।
सनिसाले प्रहरीमा दिएको उजुरीअनुसार जब गर्भवती भएको कुरा बाहिर आयो, शिवजीका बाबु परमेश्वर खंग र आमा झुलफूल देवीले उनलाई गर्भपतन गर्न दबाब दिन थाले । तर सनिसाले त्यो अस्वीकार गरेपछि उनै अभिभावकले शारीरिक रूपमा कुटपिट गर्दै बुधबार बिहान ४ बजेतिर जबर्जस्ती विषादी खुवाएको बताएकी छन् ।
‘निदाइरहेको अवस्थामा हातखुट्टा समातेर लछारपछार गरे, अनि चार–पाँच वटा ट्याब्लेट मुखमा कोचेर खुवाए,’ अस्पतालको बेडबाट बोल्दै सनिसाले भनिन्, ‘त्यसपछि म बेहोस भएँ ।’
गर्भपतन र विषादी सेवनको पुष्टि अस्पतालको स्वास्थ्य परीक्षणलेसमेत गरेको छ । अस्पतालका चिकित्सकहरूका अनुसार विषादीको प्रभावकै कारण चार महिनाको गर्भ खेरिएको हो ।
प्रेममा विवाहको आश्वासन दिएर पटक–पटक शारीरिक सम्बन्ध राख्ने शिवजी खंग अहिले फरार छन् । उनीमाथि यसअघि नै सनिसाले प्रहरीमा उजुरी दिएकी थिइन् । गाउँमा गरिएको पञ्चायती निर्णयको पालना नगरी फरार भएपछि उनी न्यायका लागि राजविराजस्थित प्रहरी कार्यालय धाउँदै गरेकी थिइन् ।
घटना भएका बेला शिवजीको परिवारमा प्रहरीको संरक्षणमा बसिरहेकी सनिसाले आफूमाथि पूर्व नियोजित आक्रमण भएको आरोप लगाएकी छन् । घटनापछि पीडित पक्षले दोषीलाई तत्काल पक्राउ गरी कारबाही गर्न माग गरेका छन् ।
प्रहरीले भने घटनाबारे अनुसन्धान भइरहेको र फरार रहेका शिवजी खंगसहित उनका अभिभावकको खोजी भइरहेको जनाएको छ ।
