काठमाडौं महानगरपालिकाका तत्कालीन प्रहरी प्रमुख राजुनाथ पाण्डेको पक्षमा उच्च अदालत पाटनले आदेश दिएको छ । न्यायाधीशद्वय ऋषिराज भण्डारी र डिल्लीरत्न श्रेष्ठको संयुक्त इजलासले बुधबार जारी गरेको आदेशमा पाण्डेलाई “तत्काल निलम्बन गर्नुपर्ने अवस्था नरहेको” ठहर गरिएको हो ।
आदेशमा उल्लेख गरिएको छ कि पाण्डे वरिष्ठ नगर प्रहरी उपरीक्षकका रूपमा कार्यरत रहँदा आफ्नो पदीय जिम्मेवारी निर्वाह गरिरहेको स्पष्ट देखिन्छ । अदालतले भनेको छ, “महानगरपालिका महानगर प्रहरी बलको वरिष्ठ नगर प्रहरी उपरीक्षक पदमा कार्यरत रहेका निवेदकको जिम्मेवारी महानगरको सुरक्षा व्यवस्थाको प्रवन्ध गर्ने हो ।”
त्यस्तै, प्रमुख प्रशासकीय अधिकृतसँग महानगर प्रहरी परिचालन, रेखदेख, नियन्त्रण तथा निर्देशन दिने कानुनी अधिकार रहेको उल्लेख गर्दै, त्यस्तो निर्देशनको पालना गर्नु महानगर प्रहरीको कर्तव्य भएको अदालतको ठहर छ । पाण्डेले कानुनी व्यवस्था नअस्वीकारेको स्पष्ट गर्दै अदालतले उल्लेख गरेको छ, “सुविधा र सन्तुलनको दृष्टिकोणले हेर्दा जाँचबुझ समितिको काम अघि बढ्न सके पनि, निवेदकलाई तत्काल निलम्बन गर्नु पर्ने अवस्था देखिँदैन ।”
उक्त फैसलाले राजुनाथ पाण्डेलाई तत्काल राहत दिएको छ भने, काठमाडौं महानगरभित्रको प्रहरी प्रशासनमा देखिएको पछिल्लो विवादमा यसले निर्णायक मोड ल्याउने अपेक्षा गरिएको छ।
