सरकारको तिर्न बाँकी सार्वजनिक ऋण २६ खर्ब ५४ अर्ब ६८ करोड रुपैयाँ पुगेको छ। सार्वजनिक ऋण व्यवस्थापन कार्यालयका अनुसार चालु आर्थिक वर्षको सुरुमा रहेको २४ खर्ब ३४ अर्ब ९ करोड रुपैयाँ ऋणमा हालसम्म २ खर्ब २० अर्ब ५८ करोड रुपैयाँ थपिएको हो ।
यो ऋण हाल मुलुकको कूल गार्हस्थ्य उत्पादन (जीडीपी) को ४३ दशमलव ४७ प्रतिशत बराबर रहेको कार्यालयले जनाएको छ ।
वैदेशिक र आन्तरिक ऋणको हिस्सा
हालसम्मको कूल सार्वजनिक ऋणमध्ये वैदेशिक ऋणको हिस्सा ५२ दशमलव शून्य ६ प्रतिशत र आन्तरिक ऋणको हिस्सा ४७ दशमलव ९४ प्रतिशत रहेको छ ।
गत जेठ मसान्तसम्म आन्तरिक ऋण १२ खर्ब ७२ अर्ब ५३ करोड र बाह्य ऋण १३ खर्ब ८२ अर्ब १२ करोड रुपैयाँ बराबर पुगेको छ ।
ऋण परिचालन र भुक्तानी अवस्था
सरकारले चालु आर्थिक वर्षमा कुल ५ खर्ब ४७ अर्ब रुपैयाँ सार्वजनिक ऋण उठाउने लक्ष्य लिएको थियो ।
यसै अवधिमा ४ खर्ब १४ अर्ब १९ करोड रुपैयाँ ऋण उठाइसकेको छ । यो वार्षिक लक्ष्यको ७५ दशमलव ७२ प्रतिशत हो ।
सरकारले चालु आवमा ऋणको साँवा र ब्याज भुक्तानीका लागि ४ खर्ब २ अर्ब ८५ करोड रुपैयाँ बजेट छुट्याएको थियो ।
गत ११ महिनामा मात्र ऋणको साँवा र ब्याज भुक्तानीमा ३ खर्ब २९ अर्ब ६० करोड रुपैयाँ खर्च भइसकेको छ ।
आन्तरिक र बाह्य ऋण भुक्तानी विवरण
गत जेठ मसान्तसम्मको अवधिमा:
-
आन्तरिक ऋणको साँवा तिर्न: २ खर्ब २३ अर्ब ३५ करोड ९४ लाख
-
आन्तरिक ऋणको ब्याज तिर्न: ५४ अर्ब ३७ करोड २५ लाख
-
बाह्य ऋणको साँवा तिर्न: ४३ अर्ब २९ करोड
-
बाह्य ऋणको ब्याज तिर्न: ८ अर्ब ५७ करोड ७३ लाख रुपैयाँ खर्च भएको छ।
सरकारी ऋण वृद्धिको यो दरले आगामी वर्षहरूमा ऋण व्यवस्थापन र आर्थिक दायित्व अझ चुनौतीपूर्ण हुने संकेत देखिएको छ ।
