घुस लिएको भिडियो सार्वजनिक भएपछि प्रहरी प्रधान कार्यालयले सप्तरीका प्रहरी प्रमुख (एसपी) ढकेन्द्र खतिवडालाई जिम्मेवारीबाट हटाएको छ ।
उनी खटाएको टोलीका एक वरिष्ठ प्रहरी नायब निरीक्षक (सई) ले घुस लिँदै गरेको भिडियो सार्वजनिक भएपछि यो कारबाही गरिएको हो । प्रारम्भिक अनुसन्धानका क्रममा फरार अभियुक्तलाई नपक्रिने सर्तमा घुस लिएको पुष्टि भएको छ ।
एचटिपी खबरका पत्रकार दिवाकर साहले सार्वजनिक गरेकाे भिडियोमा देखिएका वरिष्ठ सई विश्वनाथ त्रिपाठीमार्फत चार लाख रुपैयाँको घुस लिइएको देखिन्छ । पीडितको दाबी अनुसार, पटक–पटक गरी करिब १० लाख रुपैयाँ असुलिएको बताइन्छ । उक्त घटनाको गम्भीरताका साथ प्रहरी प्रधान कार्यालयले एसएसपी शान्तिराज कोइरालाको नेतृत्वमा छानबिन समिति गठन गरेको छ । छानबिनपछि थप कानुनी कारबाही अगाडि बढाइने जनाइएको छ । प्रहरी संगठनभित्र बढ्दो भ्रष्टाचार र गैरकानुनी व्यवहारमाथि प्रश्न उठिरहेका बेला यो घटना सार्वजनिक भएको हो ।
सप्तरीका एसपी ढकेन्द्र खतिवडालाई हटाएर एसपी गौतम केसीलाई नयाँ जिम्मेवारी दिइएको छ । एसपी केसीलाई तत्काल सप्तरीमा कार्यभार सम्हाल्न खटाइएको प्रहरी प्रधान कार्यालयले जनाएको छ ।
प्रहरी प्रशासनको शुद्धिकरण र जवाफदेहीतालाई सुनिश्चित गर्न यस्ता घटनामा कडा कारबाही आवश्यक रहेको प्रहरीका उच्च अधिकारीहरू बताउँछन् । सार्वजनिक पदमा रहेर भ्रष्टाचारमा मुछिनु गम्भीर अपराध हाे ।
भिडियाे सामाग्री
