प्रधानमन्त्री केपी शर्मा ओलीले सरकारले प्रस्तुत गरेको बजेट सकेसम्म सन्तुलित रहेको दाबी गरेका छन् । साथै, आगामी दिनमा माग र आपूर्तिबीचको सन्तुलन कायम गर्न थप प्रयास गरिने पनि बताएका छन् ।
मंगलबार प्रतिनिधिसभाको बैठकमा राष्ट्रपतिको कार्यालय, उपराष्ट्रपतिको कार्यालय, प्रधानमन्त्री तथा मन्त्रिपरिषद्को कार्यालयसहितका निकायहरूसँग सम्बन्धित विनियोजन विधेयक तथा खर्च कटौती प्रस्तावमाथिको छलफलमा सांसदहरूले उठाएका प्रश्नको जवाफ दिँदै प्रधानमन्त्री ओलीले राज्यको सीमित क्षमतिका कारण सबै सांसद सन्तुष्ट हुने स्थिति आउन नसकेको बताए ।
उनले भने, ‘‘हामीलाई छिटो र धेरै ठाउँमा विकास चाहिएको छ तर बजेट सीमित छ। त्यसैले सबै सांसद सन्तुष्ट हुने स्थिति नआउन सक्छ। माग र आपूर्तिको असन्तुलन मिलाउन आगामी दिनमा सरकार अझ सजग रहनेछ ।’’
प्रधानमन्त्री ओलीले लगानी आवश्यक भएकाले निजी क्षेत्र र वैदेशिक लगानीलाई प्रोत्साहित गरिने उल्लेख गरे । लगानी बोर्डमार्फत प्रभावकारी योजना तथा विश्लेषणका आधारमा लगानी भित्र्याइने जानकारी पनि उनले दिए ।
सांसदहरूलाई सम्बोधन गर्दै प्रधानमन्त्री ओलीले संसदलाई जनताको बलिदान, संघर्ष र सपना साकार पार्ने थलोको रूपमा मूल्यांकन गर्दै लोकतन्त्र र राष्ट्रियता कमजोर पार्ने हल्का टिप्पणी नगर्न आग्रह गरे ।
उनले विद्यमान संविधान र प्रणालीलाई थप प्रभावकारी बनाउने गरी संविधान संशोधनको तयारी भइरहेकाले त्यसको अपमान हुने खालका अभिव्यक्ति दिनबाट सांसदहरूलाई टाढा रहन आग्रह गरे ।
![पाेखरिया नगरपालिकामा भ्रष्टाचार | बचे मन्त्री र मेयर फसे कर्मचारी [ भिडियाे सहित ]](https://www.birgunjcity.com/uploads/posts/200X200/Pokhariya-nagarpalika-d-1750515182.jpg)
