प्रहरी प्रधान कार्यालय नक्सालले सबै मातहत प्रहरी कार्यालयहरूलाई परिपत्र जारी गर्दै अबदेखि आरोपीहरूको तस्बिर सार्वजनिक नगर्न निर्देशन दिएको हो ।
प्रवक्ता तथा डिआइजी विनोद घिमिरेका अनुसार मानव अधिकारसम्बन्धी सवाल उठ्न सक्ने सम्भावनालाई ध्यानमा राख्दै यस्तो निर्णय गरिएको हो । उनका अनुसार देशभरका सबै प्रहरी कार्यालयमा परिपत्र पठाइसकिएको छ ।
डिआइजी घिमिरेले भने, “आरोप पुष्टि नभइसकेका अवस्थामा तस्बिर सार्वजनिक गर्दा व्यक्तिगत अधिकार र गोपनीयताको उल्लङ्घन हुन सक्ने भएकाले अबदेखि प्रहरी निकायले आरोपीको तस्बिर सार्वजनिक गर्ने कार्य नगर्ने निर्णय गरिएको हो ।”
मानव अधिकारकर्मी तथा कानुनी क्षेत्रका व्यक्तिहरूले पनि यसअघि अनुसन्धानका क्रममा तस्बिर सार्वजनिक गर्नु गलत अभ्यास हो भन्दै आलोचना हुदैँ आएका थिए । प्रहरीले लिएको यो निर्णयलाई मानव अधिकारको सम्मानतर्फ उठाइएको सकारात्मक कदमको रूपमा लिइएको छ ।
यस निर्णयसँगै अब प्रहरीद्वारा जारी गरिने समाचार तथा सार्वजनिक सूचनामा आरोपीको नाम, उमेर, ठेगाना उल्लेख भए पनि फोटो भने समावेश गरिने छैन ।
